మాజీ ఎంపీ విజయసాయిరెడ్డి సంచలన వ్యాఖ్యలు చేశారు. కాకినాడ పోర్ట్ వాటాల బదిలీ కేసులో సీఐడీ విచారణకు హాజరైన సందర్భంగా ఆయన కీలక వ్యాఖ్యలు చేశారు. తనకు, ముఖ్యమంత్రి వైఎస్ జగన్మోహన్ రెడ్డికి మధ్య విభేదాలు సృష్టించారని విజయసాయిరెడ్డి ఆరోపించారు. కొందరు వ్యక్తులు ఎదగడానికై తనను కిందకు లాగారని ఆయన వెల్లడించారు.
విజయసాయిరెడ్డి తన వ్యాఖ్యల్లో, ఈ విషయంలో పాత్రధారులు, సూత్రధారులు ఉన్నారని తెలిపారు. జగన్ భవిష్యత్తు కోటరీ నుంచి బయటపడితేనే మెరుగవుతుందని ఆయన సూచించారు. కోటరీకి అనుకూలంగా ఉంటేనే జగన్ దగ్గరికి చేరుకునే అవకాశముంటుందని, లేదంటే దూరం పెరుగుతుందని విజయసాయిరెడ్డి ఆరోపించారు.
కోటరీ మాటలు నమ్మొద్దు
కోటరీ వల్లే జగన్కు తాను దూరమయ్యానని విజయసాయిరెడ్డి ఆవేదన వ్యక్తం చేశారు. జగన్ మనసులో తనకు స్థానం లేకపోవడంతోనే పార్టీ వీడాల్సి వచ్చిందని స్పష్టం చేశారు. కోటరీ మాటలు వినొద్దని జగన్కు చెప్పినా పట్టించుకోలేదని తెలిపారు. విరిగిన మనసు మళ్లీ అతుక్కోలేదని, వైసీపీలో మళ్లీ చేరడం జరగదని తేల్చిచెప్పారు. అయితే, జగన్కు మంచి జరగాలని ఇప్పటికీ ఆకాంక్షిస్తున్నట్లు విజయసాయిరెడ్డి అన్నారు.
లిక్కర్ స్కామ్పై సంచలన ఆరోపణలు
లిక్కర్ స్కామ్పై కూడా విజయసాయిరెడ్డి కీలక ఆరోపణలు చేశారు. ఈ స్కామ్లో ప్రధాన పాత్రధారి, సూత్రధారి కసిరెడ్డి రాజశేఖర్రెడ్డినేనని ఆయన పేర్కొన్నారు. ఈ అంశంపై మరిన్ని వివరాలు అవసరమైనప్పుడు వెల్లడిస్తానని తెలిపారు.
రాజకీయ ప్రేరేపిత కేసు
ఈ కేసును విజయసాయిరెడ్డి పూర్తిగా రాజకీయ ప్రేరేపితమని అభివర్ణించారు. కేవీ రావుతో తనకు ముఖపరిచయం తప్ప ఎలాంటి లావాదేవీలు లేవని స్పష్టం చేశారు. కేవీ రావుకు విక్రాంత్ రెడ్డిని పరిచయం చేయాల్సిన అవసరం తనకు లేదని పేర్కొన్నారు. చివరి వరకు విక్రాంత్ రెడ్డే అన్ని విషయాలు నిర్వహించారని, ఇదే విషయాన్ని సీఐడీకి వెల్లడించానని విజయసాయిరెడ్డి స్పష్టం చేశారు.
One thought on “విజయసాయిరెడ్డి సంచలన వ్యాఖ్యలు”
Comments are closed.