హైదరాబాద్ ప్రపంచ నగరాలతో పోటీ : సీఎం

తెలంగాణ రాజధాని హైదరాబాద్‌ దేశంలోని ఇతర నగరాలతో కాదు, ప్రపంచంలోని అగ్రశ్రేణి మెట్రో నగరాలతో పోటీ పడుతోందని రాష్ట్ర ముఖ్యమంత్రి రేవంత్ రెడ్డి స్పష్టం చేశారు. పెట్టుబడుల ఆకర్షణే లక్ష్యంగా తమ ప్రభుత్వం పనిచేస్తోందని, రానున్న వందేళ్ల అవసరాలను దృష్టిలో ఉంచుకొని అభివృద్ధి ప్రణాళికలు రూపొందిస్తున్నామని వెల్లడించారు. గురువారం రంగారెడ్డి జిల్లా మహేశ్వరం మండలంలో మంత్రి ధర్మారెడ్డి శ్రీధర్ బాబుతో కలిసి సీఎం పర్యటించారు. ఈ సందర్భంగా కొత్తగా ఏర్పాటు చేసిన ఇండస్ట్రియల్ పార్కు, మలబార్ జెమ్స్ అండ్ జ్యువెలరీ తయారీ కేంద్రాన్ని ప్రారంభించారు. అనంతరం ఏర్పాటు చేసిన సభలో ఆయన మాట్లాడారు. ‘‘కాంగ్రెస్ ప్రభుత్వం దేశానికి ఒక ఫ్యూచర్ సిటీని అందించేందుకు కృషి చేస్తోంది. దీనిలో భాగంగా ‘విజన్ 2047’ పేరుతో మెట్రో అభివృద్ధికి సమగ్ర ప్రణాళిక రూపొందించాం. దేశీయ, అంతర్జాతీయ కన్సల్టెంట్ల సహకారంతో హైదరాబాద్ అభివృద్ధిపై దృష్టిసారించాం. పెట్టుబడిదారులకు పూర్తి భద్రత కల్పించడమే కాక, వారి వ్యాపారాలు లాభదాయకంగా సాగేలా అన్ని మౌలిక వసతులు అందిస్తున్నాం,’’ అని సీఎం చెప్పారు.

తెలంగాణ తమిళనాడు, కేరళ వంటి అభివృద్ధి చెందిన రాష్ట్రాలతో పోటీపడుతోందని ఆయన అన్నారు. ప్రభుత్వం పారదర్శక పాలనకు కట్టుబడి పనిచేస్తోందని, పరిశ్రమల ఏర్పాటుకు అనుకూల వాతావరణం కల్పించేందుకు సిద్ధంగా ఉందన్నారు.

ఇక మంత్రి శ్రీధర్ బాబు మాట్లాడుతూ.. రాష్ట్రంలో తయారీ రంగం 9 శాతానికి పైగా వృద్ధి చెందుతోందని తెలిపారు. ఇటీవల అమలులోకి వచ్చిన గ్రీన్ ఇండస్ట్రియల్ పాలసీ, నూతన ఎంఎస్‌ఎంఈ పాలసీ–2025తో పరిశ్రమల ప్రోత్సాహం పెరుగుతోందని తెలిపారు. కొత్త పరిశ్రమల కోసం ఇప్పటివరకు 4,200 దరఖాస్తులు వచ్చాయని, వాటిలో 98 శాతం దరఖాస్తులు కేవలం 15 రోజుల్లోనే పరిష్కరించామన్నారు. సింగిల్ విండో విధానం ద్వారా వేగంగా, పారదర్శకంగా అనుమతులు మంజూరు చేస్తున్నామని మంత్రి స్పష్టం చేశారు.

Read Mode : టీజీపీ‌ఎస్‌సీ గ్రూప్-1 పై వచ్చిన ఆరోపణలు నిరాధారమే