ఏపీ ప్రభుత్వం: యథావిధిగా కొనసాగనున్న పాపికొండల యాత్ర
రాజమహేంద్రవరం, డిసెంబర్ 15: ఆంధ్రప్రదేశ్ ముఖ్యమంత్రి నారా చంద్రబాబు నాయుడు సోమవారం పోలవరం ప్రాజెక్ట్ను సందర్శించనున్నారు. ఈ నేపథ్యంలో భద్రతా కారణాలతో పాపికొండల యాత్రను తాత్కాలికంగా నిలిపివేశారు. దీనిపై బోటు యజమానులు, పర్యాటకులు ఆందోళన వ్యక్తం చేశారు.
మంత్రివర్యులు నిమ్మల రామానాయుడు ఈ విషయంపై స్పందిస్తూ, పాపికొండల యాత్ర యథావిధిగా కొనసాగించాలని ఉన్నతాధికారులను సీఎం ఆదేశించినట్లు తెలిపారు. టూర్ బుక్ చేసుకున్న యాత్రికులు ఎటువంటి ఆందోళన చెందాల్సిన అవసరం లేదని స్పష్టం చేశారు.
పర్యాటక బోట్లకు అనుమతులు:
భద్రతా కారణాలతో ఆదివారం నుంచి పర్యాటక బోట్లను నిలిపివేసిన సంగతి తెలిసిందే. ఈ నిర్ణయంపై పర్యాటకులు మరియు బోటు యజమానులు వ్యతిరేకత వ్యక్తం చేశారు. ఈ పరిణామాలపై సీఎం కార్యాలయం స్పందించి, పర్యాటక బోట్ల యాత్రను యథావిధిగా కొనసాగించేలా జిల్లా అధికారులకు ఆదేశాలు జారీ చేసింది. అల్లూరు జిల్లా ఎస్పీ మాట్లాడుతూ, ప్రభుత్వ మార్గదర్శకాలను పాటించే పర్యాటక బోట్లకు అనుమతి ఇవ్వనున్నట్లు ప్రకటించారు.
సీఎం చంద్రబాబు పర్యటన:
సీఎం చంద్రబాబు నాయుడు సోమవారం ఉదయం 11.00 గంటలకు పోలవరం చేరుకుంటారు. ప్రాజెక్ట్ను సందర్శించిన అనంతరం ఉన్నతాధికారులతో సమీక్ష సమావేశం నిర్వహిస్తారు. మధ్యాహ్నం 1.25 గంటలకు పోలవరం నుంచి సెక్రటేరియట్ వైపు బయలుదేరుతారు. చంద్రబాబు కూటమి ప్రభుత్వం కొలువు తీరిన తర్వాత ఇది ఆయన పోలవరం ప్రాజెక్ట్కి రెండో సందర్శన.
జూన్ 27న తొలి పర్యటన అనంతరం, సోమవారం పర్యటన సందర్భంగా పోలీసులు భారీ బందోబస్తు ఏర్పాటు చేశారు.
