రాష్ట్రంలో కాంగ్రెస్ పునరుజ్జీవనంపై కీలక వ్యాఖ్యలు

రాష్ట్రంలోని కాంగ్రెస్ పార్టీ పునరుద్ధరణకు కొత్త ఊపును అందిస్తూ, ఏపీసీసీ అధ్యక్షురాలు వైఎస్ షర్మిల కీలక వ్యాఖ్యలు చేశారు. సోమవారం ఆమె విజయవాడలో మీడియాతో మాట్లాడుతూ, రాష్ట్రవ్యాప్తంగా 26 జిల్లాల్లో కార్యకర్తలతో సమావేశాలు నిర్వహించామని, 2500 కిలోమీటర్ల మేర ఈ నెలలోనే పర్యటించానని తెలిపారు.

ప్రతి జిల్లాలో పార్టీ నేతలు, కార్యకర్తల సూచనలు స్వీకరించామని పేర్కొన్నారు. పార్టీలో ఏర్పడిన విభజనను తొలగించి కాంగ్రెస్‌ను పూర్వ వైభవంలోకి తీసుకెళ్లే లక్ష్యంతో ముందుకెళ్తున్నామని స్పష్టం చేశారు.

విభజన హామీలపై కేంద్రాన్ని ఆగ్రహంగా ప్రశ్నించిన షర్మిల

రాష్ట్రానికి ఇచ్చిన విభజన హామీలను కేంద్రం నేటికీ అమలు చేయలేదని షర్మిల విమర్శించారు. బీజేపీ ప్రభుత్వం పై తీవ్ర అసంతృప్తి వ్యక్తం చేస్తూ.. చంద్రబాబు, జగన్, పవన్‌.. ఎవ్వరూ మోదీని నిలదీయలేకపోతున్నారని ఆరోపించారు. ‘‘జగన్ బీజేపీతో రహస్య ఒప్పందం చేసుకుంటే.. చంద్రబాబు బహిరంగ కూటమిలో కలిసి పోతున్నాడు. కానీ కాంగ్రెస్ మాత్రం స్పష్టమైన వైఖరితో మోదీని నిలదీస్తోంది’’ అని వ్యాఖ్యానించారు.

పోలవరం–రాజధాని అంశాలపై కాంగ్రెస్ నిలదీస్తుందని హామీ

పోలవరం ఎత్తు తగ్గింపుపై కూడా రాష్ట్ర నేతలు మౌనంగా ఉండటంపై ఆమె ఆవేదన వ్యక్తం చేశారు. ‘‘ప్రాజెక్టు ఎత్తు తగ్గించినా ఒక్క ఎంపీ మాట్లాడడం లేదు. రాజధాని అభివృద్ధికి నిధులు ఇవ్వకుండా అప్పులిచ్చిన కేంద్రంపై వైసీపీ మౌనంగా ఉంది’’ అంటూ ఆమె మండిపడ్డారు.

కాంగ్రెస్‌నే ప్రజల ఆశాజ్యోతి: షర్మిల

రాష్ట్ర ప్రజల భవిష్యత్తు కోసం కాంగ్రెస్ పార్టీకి మళ్లీ నూతన ఊపొస్తుందని షర్మిల పేర్కొన్నారు. ‘‘ఇందిరా గాంధీ, రాజీవ్ గాంధీ, వైఎస్ఆర్ లాంటి నేతలు చేసిన త్యాగాలను ప్రజలు మరవరు. సోనియా, రాహుల్ గాంధీ నాయకత్వంలో పార్టీ తిరిగి నిలవబోతోంది. రాహుల్ గాంధీ ప్రధాని అయితేనే విభజన హామీలు అమలవుతాయి’’ అని పేర్కొన్నారు.

అలాగే కాంగ్రెస్ పార్టీలో చేరి నిజమైన ప్రజాసేవ చేయాలనుకుంటున్న యువత ముందుకు రావాలని ఆమె పిలుపునిచ్చారు. కమిట్‌మెంట్‌తో పనిచేసే వారితో కాంగ్రెస్ మరింత బలోపేతమవుతుందని ఆశాభావం వ్యక్తం చేశారు.

read More : ప్రభుత్వ బడిలో పిల్లల చేర్పు: Minister