ఎస్ఎల్బీసీ ప్రమాదం: రాజకీయ విమర్శలపై మంత్రి కోమటిరెడ్డి ఆగ్రహం
శ్రీశైలం ఎడమ గట్టు కాలువ సొరంగ మార్గంలో పైకప్పు కూలిన ఘటనకు సంబంధించి సహాయక చర్యలు వేగంగా కొనసాగుతున్నాయి. ఈ ప్రమాదంలో ఇద్దరు ఇంజనీర్లు, ఇద్దరు ఆపరేటర్లు, నలుగురు కార్మికులు చిక్కుకుపోయారు. వారిని రక్షించేందుకు ఎన్డీఆర్ఎఫ్, ఎస్డీఆర్ఎఫ్, సింగరేణి రెస్క్యూ బృందాలు, హైడ్రా, ఇండియన్ ఆర్మీ, ప్రత్యేక బెటాలియన్లు సహాయక చర్యల్లో పాల్గొన్నాయి.
ఈ ఘటనపై స్పందించిన మంత్రి కోమటిరెడ్డి వెంకట్ రెడ్డి, బీఆర్ఎస్ నేతలు మానవత్వాన్ని మరచిపోయారని, ఇటువంటి విషాద సంఘటనలను రాజకీయాలకు వాడుకోవడం సరైనది కాదని విమర్శించారు. సీఎం రేవంత్ రెడ్డి, మంత్రులు సంఘటనాస్థలంలోనే ఉండి సహాయక చర్యలను పర్యవేక్షిస్తున్నారని తెలిపారు. తూప్రాన్ రైలు ప్రమాదంలో విద్యార్థులు మరణించినప్పుడు అప్పటి సీఎం కేసీఆర్ పరామర్శించలేదని గుర్తుచేశారు. ఇలాంటి విపత్తుల సమయంలో రాజకీయ విమర్శలకు మార్గం లేకుండా అందరూ ఒక్కటిగా పని చేయాలని హితవు పలికారు.
గత బీఆర్ఎస్ ప్రభుత్వం ఎస్ఎల్బీసీ కాలువ పనులను నిర్లక్ష్యంగా వదిలేసిందని, ప్రాజెక్ట్ పూర్తి చేసేందుకు ప్రస్తుత ప్రభుత్వం ప్రయత్నిస్తుంటే ఇలాంటి ప్రమాదం చోటుచేసుకోవడం విచారకరమని అన్నారు. లోపల చిక్కుకున్న వారిని సురక్షితంగా బయటకు తీసుకురావడానికి అన్ని ప్రయత్నాలు జరుగుతున్నాయని తెలిపారు. సహాయక చర్యలకు మట్టి, బురద, నీటి ప్రవాహం వంటి అడ్డంకులు ఉన్నప్పటికీ, అధికార యంత్రాంగం నిరంతరం కృషి చేస్తోందని వివరించారు.
లోపల పరిస్థితి క్లిష్టంగా మారినప్పటికీ, విద్యుత్, ఆక్సిజన్ సరఫరా కొనసాగుతుందని, మిగిలిన సహాయక చర్యలకు ఇంకా రెండు మూడు రోజులు పట్టే అవకాశముందని మంత్రి జూపల్లి కృష్ణారావు తెలిపారు. ప్రభుత్వ అధికారులు, రెస్క్యూ బృందాలు తమ వంతు బాధ్యతను నిర్వర్తిస్తున్నాయని, వారిని రక్షించేందుకు అందరూ ఏకమవ్వాలని మంత్రి కోమటిరెడ్డి పిలుపునిచ్చారు.
2 thoughts on “ఎస్ఎల్బీసీ ప్రమాదంపై మంత్రి కోమటిరెడ్డి స్పందన”
Comments are closed.