హైదరాబాద్: దేశవ్యాప్తంగా లోక్సభ నియోజకవర్గాల పునర్విభజన చేపట్టాలనే ఆలోచనలో కేంద్ర ప్రభుత్వం ఉంటే, ఆ విభజనను ఆయా రాష్ట్రాలు అందిస్తున్న ఆర్థిక సహాయాన్ని దృష్టిలో ఉంచుకుని చేయాలని భారత్ రాష్ట్ర సమితి (BRS) కార్యనిర్వాహక అధ్యక్షుడు కేటీఆర్ (KTR) స్పష్టం చేశారు. ఈ సందర్భంగా, తమిళనాడు ముఖ్యమంత్రి ఎం.కె. స్టాలిన్ (MK Stalin) చేసిన వ్యాఖ్యలకు పూర్తి మద్దతు తెలిపారు. స్టాలిన్ దక్షిణాది రాష్ట్రాలకు అన్యాయం చేయకూడదన్న వాదనను సమర్థిస్తూ, ఈ అంశంపై తన ‘ఎక్స్’ (X) ఖాతాలో పోస్ట్ చేశారు.
దేశ అభివృద్ధిలో కీలక పాత్ర పోషిస్తున్న దక్షిణాది రాష్ట్రాలు, కుటుంబ నియంత్రణను సమర్థవంతంగా అమలు చేశాయి. అలాంటి రాష్ట్రాలను ఆ విషయంలో శిక్షించడం సరికాదని కేటీఆర్ అభిప్రాయపడ్డారు. ఆయా రాష్ట్రాల ప్రగతిని పరిగణనలోకి తీసుకోకుండా నియోజకవర్గాల పునర్విభజన చేస్తే, అది ప్రజాస్వామ్య స్ఫూర్తికి విరుద్ధంగా మారుతుందని వ్యాఖ్యానించారు. తెలంగాణతో పాటు దక్షిణాది రాష్ట్రాలు దేశ ఆర్థిక ప్రగతికి చేస్తున్న సహకారాన్ని ఎవరు నిరాకరించలేరని కేటీఆర్ స్పష్టం చేశారు.
దేశ జనాభాలో తెలంగాణ వాటా కేవలం 2.8 శాతమే అయినప్పటికీ, దేశ జీడీపీలో 5.2 శాతం వాటా కలిగి ఉందని కేటీఆర్ వివరించారు. కాబట్టి, నియోజకవర్గాల పునర్విభజనలో దక్షిణాది రాష్ట్రాలను విస్మరించకుండా, వాటి ఆర్థిక సహకారాన్ని దృష్టిలో ఉంచుకుని సముచిత నిర్ణయం తీసుకోవాలని ఆయన కేంద్రాన్ని కోరారు.
One thought on “నియోజకవర్గాల పునర్విభజనలో దక్షిణాది రాష్ట్రాల ఆర్థిక సహకారాన్ని పరిగణించాలి: కేటీఆర్”
Comments are closed.