అశుతోష్ శర్మ తుపాన్ ఇన్నింగ్స్ – ఒంటిచేత్తో ఢిల్లీకి అద్భుత విజయం

ఐపీఎల్‌ 2025లో వైజాగ్ వేదికగా జరిగిన ఢిల్లీ క్యాపిటల్స్ (డీసీ) – లక్నో సూపర్ జెయింట్స్ (ఎల్ఎస్‌జీ) మ్యాచ్‌లో ఢిల్లీ ఉత్కంఠభరిత విజయం నమోదు చేసింది. కేవలం 7 పరుగులకే 3 వికెట్లు కోల్పోయిన ఢిల్లీ జట్టును అశుతోష్ శర్మ తన ధాటిగమైన బ్యాటింగ్‌తో ఒంటిచేత్తో గెలిపించాడు.

31 బంతుల్లో 66 పరుగుల మెరుపు ఇన్నింగ్స్ ఆడిన అశుతోష్, చివరి మూడు ఓవర్లలో కేవలం 11 బంతుల్లోనే 46 పరుగులు బాదాడు. అతని ఈ విజృంభణతో ఢిల్లీ ఓటమి అంచు నుంచి గెలుపు దిశగా దూసుకెళ్లింది. ఈ అద్భుత ప్రదర్శనకు గానూ అశుతోష్ ‘ప్లేయర్ ఆఫ్ ది మ్యాచ్’ అవార్డును గెలుచుకున్నాడు.

ధావన్‌కు అంకితమైన అవార్డు
మ్యాచ్ అనంతరం అశుతోష్ మాట్లాడుతూ, “ఈ మ్యాన్ ఆఫ్ ది మ్యాచ్ అవార్డును నా గురువు శిఖర్ పాజీకి అంకితం చేయాలనుకుంటున్నాను” అని భావోద్వేగంతో చెప్పాడు. ఆపై డీసీ డ్రెస్సింగ్ రూమ్‌లో శిఖర్ ధావన్‌కు వీడియో కాల్‌ చేసి అతని ఆశీస్సులు తీసుకున్నాడు. ఈ సందర్భంగా “గబ్బర్” ధావన్ కూడా అశుతోష్‌ను ప్రత్యేకంగా అభినందించాడు.

పంజాబ్ నుంచి ఢిల్లీకి.. అశుతోష్ ఆరంభ ప్రయాణం
2024 ఐపీఎల్‌ సీజన్‌లో అశుతోష్ శర్మ, శిఖర్ ధావన్ పంజాబ్ కింగ్స్ (పీబీకేఎస్) తరఫున ఆడారు. గత సీజన్‌లో ఫినిషర్‌గా మెరుగైన ప్రదర్శన చేసిన అతడిని ఈసారి ఢిల్లీ క్యాపిటల్స్ ఐపీఎల్ మెగా వేలంలో రూ. 3.80 కోట్లకు కొనుగోలు చేసింది. తాజాగా లక్నోపై ఆడిన మ్యాచ్లో అతని ఆత్మవిశ్వాసపూరిత ఇన్నింగ్స్ ఢిల్లీ విజయంలో కీలకంగా మారింది.

ఈ ఘన విజయంతో ఢిల్లీ క్యాపిటల్స్ పాయింట్ల పట్టికలో కీలక స్థానం దక్కించుకోగా, అశుతోష్ శర్మ తన అసాధారణ ప్రదర్శనతో అభిమానుల మనసులు గెలుచుకున్నాడు.

Read More : షాంపైన్‌లో మునిగి తేలిన అజిత్.. రేసింగ్‌లో ఘనవిజయం!