టీమిండియా చీఫ్ సెలెక్టర్ అజిత్ అగార్కర్పై బీసీసీఐ మరోసారి తన పూర్తి విశ్వాసాన్ని ప్రదర్శించింది. ఆయన పదవీకాలాన్ని 2026 జూన్ వరకు పొడిగిస్తూ కీలక నిర్ణయం తీసుకుంది. అగార్కర్ నేతృత్వంలో భారత్ 2024 టీ20 ప్రపంచకప్, 2025 ఛాంపియన్స్ ట్రోఫీ వంటి ప్రతిష్ఠాత్మక టైటిళ్లను గెలుచుకోవడం ఈ నిర్ణయానికి ప్రధాన కారణంగా చెబుతున్నారు. ఇప్పటికే 2025 ఐపీఎల్కు ముందుగానే ఆయన కాంట్రాక్ట్ను పునరుద్ధరించినట్లు సమాచారం. అగార్కర్ నాయకత్వంలోని సెలక్షన్ కమిటీ, జట్టులో విజయవంతమైన మార్పులు తీసుకురావడంలో సఫలమైందని బీసీసీఐ అధికారులు వెల్లడించారు. ఆయన పదవీకాలంలో జట్టు అనేక విజయాలు సాధించడమే కాకుండా, టెస్ట్లు, టీ20 ఫార్మాట్లలో కొత్త మార్పులు అమలు చేయగలిగింది.
ఇదే సమయంలో స్టార్ పేసర్ జస్ప్రీత్ బుమ్రా వర్క్లోడ్ మేనేజ్మెంట్పై కూడా అగార్కర్ స్పష్టత ఇచ్చారు. “బుమ్రాను దీర్ఘకాలం ఫిట్గా ఉంచేందుకు ప్రత్యేక శ్రద్ధ తీసుకుంటున్నాం. రాతపూర్వక ప్రణాళిక లేకపోయినా, జట్టు మేనేజ్మెంట్, ఫిజియోలు ఎప్పటికప్పుడు అతడిని పర్యవేక్షిస్తున్నారు. అతను జట్టుకు ఎంత విలువైన వాడో మాకు తెలుసు. అందుకే అతని ఆరోగ్యం, ఫిట్నెస్పై ప్రారంభం నుంచే జాగ్రత్తలు తీసుకుంటున్నాం” అని ఆయన తెలిపారు.
ప్రపంచకప్, ఛాంపియన్స్ ట్రోఫీ, అలాగే ఆస్ట్రేలియా, ఇంగ్లండ్ సిరీస్లకు బుమ్రా అందుబాటులో ఉండటం అత్యంత కీలకమని అగార్కర్ స్పష్టం చేశారు. గతంలో గాయాలతో ఇబ్బంది పడ్డందున, ఇకపై అతడి ఫిట్నెస్పై మరింత ప్రత్యేక దృష్టి పెట్టబోతున్నామని చెప్పారు. జట్టు అవసరాలు, వైద్య బృందం సూచనల ఆధారంగా మాత్రమే బుమ్రాను మ్యాచ్లకు ఎంపిక చేస్తామని ఆయన స్పష్టంగా పేర్కొన్నారు.
Read More : ఆసియా కప్కు భారత జట్టు ప్రకటన
One thought on “అజిత్ అగార్కర్ పదవీకాలం 2026 వరకు పొడిగింపు”
Comments are closed.