2024 లోక్సభ ఎన్నికల్లో బీజేపీ, కేంద్ర ఎన్నికల సంఘం (ఈసీ) కలిసి ‘భారీ క్రిమినల్ మోసం’ చేశాయంటూ కాంగ్రెస్ సీనియర్ నేత రాహుల్ గాంధీ చేసిన ఆరోపణలకు, ఆ పార్టీ ఎంపీ శశి థరూర్ మద్దతు తెలిపారు. ఇటీవల పార్టీ హైకమాండ్తో విభేదిస్తున్న థరూర్, ఈసారి రాహుల్ పక్షాన నిలవడం రాజకీయ వర్గాల్లో చర్చనీయాంశమైంది. రాహుల్ గాంధీ ప్రకారం, ఎన్నికల ప్రక్రియ ముందుగా నిర్ణయించిన విధంగానే జరిగిందని, ఈసీ బీజేపీతో కుమ్మక్కై పనిచేసిందని ఆరోపించారు. ఉదాహరణగా కర్ణాటకలోని మహదేవపుర అసెంబ్లీ నియోజకవర్గాన్ని ప్రస్తావించారు. అక్కడ బీజేపీకి 1,14,046 ఓట్ల భారీ ఆధిక్యం రావడంతో, బెంగళూరు సెంట్రల్ లోక్సభ సీటును 32,707 ఓట్ల మెజారిటీతో గెలిచిందని తెలిపారు. కాంగ్రెస్ ఇతర నియోజకవర్గాల్లో ఆధిక్యంలో ఉన్నప్పటికీ, ఒకే నియోజకవర్గం ఫలితమే మొత్తం గణాంకాలను మార్చేసిందని ఆయన అన్నారు.
ఈ ఆరోపణల నేపథ్యంలో 10-15 ఏళ్ల ఓటరు డేటా, పోలింగ్ కేంద్రాల సీసీటీవీ ఫుటేజీని అందించాలని రాహుల్ ఈసీని డిమాండ్ చేశారు. ఇవి ఇవ్వకపోతే, ఈసీ కూడా ఈ నేరంలో భాగమని ఆయన స్పష్టం చేశారు.
థరూర్ తన ఎక్స్ పోస్ట్లో, “రాహుల్ గాంధీ లేవనెత్తిన ప్రశ్నలు చాలా తీవ్రమైనవి. అన్ని పార్టీలు, ఓటర్ల ప్రయోజనాల దృష్ట్యా వీటిని పరిష్కరించాలి. ప్రజాస్వామ్యం ఎంతో విలువైనది, దాని విశ్వసనీయతను నిర్లక్ష్యం, అసమర్థత లేదా కావాలని చేసిన మోసం ద్వారా దెబ్బతీయకూడదు” అని పేర్కొన్నారు. ఈ విషయాలపై ఈసీ స్పష్టమైన వివరణ ఇవ్వాలని కూడా ఆయన కోరారు. మరోవైపు, రాహుల్ ఆరోపణలను బీజేపీ పూర్తిగా ఖండించింది. పార్టీ ప్రతినిధులు మాట్లాడుతూ, “బీజేపీ విజయాన్ని మోసంగా పిలవడం ఓటర్లను అవమానించడమే. కాంగ్రెస్ పదేపదే ఓడిపోవడంతో కలిగిన నిరాశ, కోపంతోనే రాహుల్ ఇలాంటి నిరాధార ఆరోపణలు చేస్తున్నారు. ఇలాంటి నిర్లక్ష్య ప్రవర్తన వల్ల ప్రజలు కాంగ్రెస్ను తిరస్కరిస్తూనే ఉంటారు” అని వ్యాఖ్యానించారు.
Read More : ఇరు దేశాల మధ్య వ్యూహాత్మక చర్చలు
One thought on “రాహుల్ ఆరోపణలకు థరూర్ మద్దతు”
Comments are closed.