వైఎస్ షర్మిల ఆగ్రహం: పెట్రోల్, డీజిల్ ధరలపై ప్రభుత్వాన్ని ప్రశ్నించిన ఏపీసీసీ చీఫ్

ఆంధ్రప్రదేశ్‌లో పెట్రోల్, డీజిల్ ధరలు పొరుగు రాష్ట్రాల కంటే అధికంగా ఉన్నాయని ఏపీసీసీ చీఫ్ వైఎస్ షర్మిల తీవ్ర విమర్శలు చేశారు. గతంలో కూటమి పార్టీలు ప్రజలకు ఇచ్చిన హామీలను నెరవేర్చకుండా ఇప్పుడు మౌనం పాటిస్తున్నాయని ఆమె మండిపడ్డారు.

ఇంధనంపై అధిక ధరలు – పొరుగు రాష్ట్రాలతో పోలిక
వైఎస్ షర్మిల పేర్కొన్న వివరాల ప్రకారం, ప్రస్తుతం ఏపీలో పెట్రోల్ ధర లీటరుకు రూ. 109.60, డీజిల్ ధర రూ. 97.47గా ఉంది. అదే తమిళనాడులో పెట్రోల్ రూ. 100.86, డీజిల్ రూ. 92.39, కర్ణాటకలో పెట్రోల్ రూ. 102.90, డీజిల్ రూ. 88.99, తెలంగాణలో పెట్రోల్ రూ. 107.46, డీజిల్ రూ. 95.70గా ఉంది. పొరుగు రాష్ట్రాలతో పోల్చితే ఏపీలో పెట్రోల్, డీజిల్ ధరలు భారీగా పెరిగాయని ఆమె వెల్లడించారు.

టీడీపీ-వైసీపీ పాలనపై షర్మిల ధ్వజం
టీడీపీ, వైసీపీ ప్రభుత్వాలు గత 10 ఏళ్లుగా ఇంధనంపై అదనపు పన్నుల వసూళ్ల పేరుతో ప్రజలను దోచుకున్నాయని షర్మిల తీవ్ర స్థాయిలో మండిపడ్డారు. చంద్రబాబు నాయుడు ప్రతిపక్షంలో ఉన్నప్పుడు పెట్రోల్, డీజిల్ ధరలు తగ్గించొచ్చని పేర్కొనడం, ఇప్పుడు అధికారంలోకి వచ్చాక మౌనం పాటించడం దారుణమన్నారు. గత ఐదేళ్లలో రూ. 25 వేల కోట్లు, మొత్తం 10 ఏళ్ల పాలనలో రూ. 50 వేల కోట్లకు పైగా ఇంధన పన్నులు వసూలు చేశారని ఆరోపించారు.

హామీలపై నిలదీత – ధరలు ఎప్పటికి తగ్గిస్తారు?
పెట్రోల్, డీజిల్ ధరలను రూ. 17 తగ్గిస్తామని కూటమి ప్రభుత్వాలు ఇచ్చిన హామీని నెరవేర్చాలని షర్మిల డిమాండ్ చేశారు. ఇప్పుడు అధికారంలో ఉన్న టీడీపీ-జనసేన-బీజేపీ కూటమి తమ హామీలను నిలబెట్టుకోవాలని స్పష్టం చేశారు. ప్రజలకు న్యాయం చేయాలని, ధరలు తగ్గించే గడువు ఏంటో తక్షణమే ప్రకటించాలని ఏపీసీసీ తరఫున డిమాండ్ చేశారు.

Read More : ఆంధ్రప్రదేశ్‌లో అంతర్జాతీయ విద్యకు నూతన దశా దిశ! జార్జియా నేషనల్ యూనివర్సిటీ ₹1300 కోట్లు పెట్టుబడి