తెలంగాణ అసెంబ్లీ బడ్జెట్ సమావేశాలు నేటి నుంచి (మార్చి 12) ప్రారంభంకానున్నాయి. ప్రస్తుత సమావేశాల్లో అభివృద్ధి, సంక్షేమ పథకాలను కేంద్ర బిందువుగా తీసుకుని అధికారపక్షం వ్యూహరచన చేస్తుండగా, ప్రజా సమస్యలపై గళమెత్తాలని బీఆర్ఎస్ వ్యూహ రచన చేస్తున్నది. ఇక బీజేపీ సైతం తన సూపర్ సిక్స్ వ్యూహంతో ప్రతిపక్షంపై విమర్శలు చేసేందుకు సిద్ధమవుతోంది.
సమావేశాల తొలి రోజు ఉభయసభలను ఉద్దేశించి గవర్నర్ జిష్ణుదేవ్ వర్మ ప్రసంగించనున్నారు. అనంతరం సభ కొద్దిసేపటికి వాయిదా పడనుంది. తర్వాత స్పీకర్ అధ్యక్షతన బీఏసీ (బిజినెస్ అడ్వైజరీ కమిటీ) సమావేశం జరగనుంది. ఈ సమావేశంలో అసెంబ్లీ కొనసాగింపు గడువుపై నిర్ణయం తీసుకోనున్నారు.
కీలక అంశాలపై చర్చ
ఈ నెల 15 నుంచి 18 వరకు కులగణన సర్వే, బీసీ రిజర్వేషన్ల బిల్లు, ఎస్సీ వర్గీకరణ బిల్లుపై చర్చలు జరగనున్నాయి. ముఖ్యంగా బీసీ రిజర్వేషన్ల బిల్లుకు రాష్ట్ర అసెంబ్లీలో ఆమోదం తెలపడం ద్వారా ఈ అంశాన్ని కేంద్ర ప్రభుత్వం దృష్టికి తీసుకెళ్లాలని రాష్ట్ర ప్రభుత్వం ప్రయత్నిస్తోంది. దీంతో పాటు, ప్రధాని నరేంద్ర మోదీని కలిసేందుకు అఖిలపక్ష నేతలతో కలసి ఢిల్లీ పర్యటనకు వెళ్లే అంశంపైనా రాష్ట్ర ప్రభుత్వం నిర్ణయం తీసుకోనుంది.
సభ ముఖ్య షెడ్యూల్:
- మార్చి 12: గవర్నర్ జిష్ణుదేవ్ వర్మ ఉభయసభలను ఉద్దేశించి ప్రసంగిస్తారు. BAC సమావేశంలో సభకు సంబంధించిన ప్రధాన ఎజెండా ఖరారు చేయనున్నారు.
- మార్చి 13: గవర్నర్ ప్రసంగానికి ధన్యవాద తీర్మానంపై చర్చ జరగనుంది.
- మార్చి 14: హోలీ పండగ సందర్భంగా అసెంబ్లీకి సెలవు.
- మార్చి 15-18: కులగణన సర్వే, బీసీ రిజర్వేషన్ల బిల్లు, ఎస్సీ వర్గీకరణ బిల్లుపై చర్చ.
- మార్చి 18 లేదా 19: 2025-26 రాష్ట్ర బడ్జెట్ను ప్రవేశపెట్టే అవకాశం.
- మార్చి 27 లేదా 28: అసెంబ్లీ సమావేశాలు ముగిసే అవకాశం.
ఈ సమావేశాల్లో కృష్ణా జలాల హక్కు, రైతుల ఆత్మహత్యలు, రుణమాఫీ, రైతు భరోసా, స్థానిక సంస్థల నిధుల లేమి వంటి అంశాలపై తీవ్రంగా చర్చ జరుగనుంది. రాష్ట్రంలో కులగణన సర్వే, ఎస్సీ వర్గీకరణ చేపట్టిన ఘనత తెలంగాణ ప్రభుత్వానిదేనని సీఎం రేవంత్ రెడ్డి గట్టిగా వాదించనున్నట్లు సమాచారం.
అసెంబ్లీ సమావేశాల్లో జరిగే చర్చలు రాష్ట్ర రాజకీయాల్లో కీలక మలుపు తీసుకునే అవకాశం ఉందని విశ్లేషకులు అంచనా వేస్తున్నారు.
One thought on “తెలంగాణ అసెంబ్లీ బడ్జెట్ సమావేశాలు: అభివృద్ధి, సంక్షేమ అంశాలపై వేడెక్కనున్న చర్చలు”
Comments are closed.