రష్యా నుంచి భారత్ చమురు కొనుగోలు చేస్తున్న విషయంపై అమెరికా అధ్యక్షుడు డొనాల్డ్ ట్రంప్ చేసిన వ్యాఖ్యలపై రష్యా ఘాటుగా స్పందించింది. ఈ వివాదంలో భారత్కు పూర్తి మద్దతు ప్రకటిస్తూ, సార్వభౌమ దేశాలు తమ వాణిజ్య భాగస్వాములను ఎంచుకునే హక్కు ఎవరూ ప్రశ్నించలేరని స్పష్టం చేసింది.
రష్యా అధ్యక్షుడి ప్రెస్ సెక్రటరీ డిమిత్రి పెస్కోవ్ మంగళవారం ఈ విషయంపై మాట్లాడారు. భారత్ను ఉద్దేశించి అమెరికా చేస్తున్న బెదిరింపులను గమనిస్తున్నామని, కానీ వాటిని చట్టబద్ధమైనవిగా పరిగణించబోమని తెలిపారు. ప్రతి దేశం తన ప్రయోజనాలకు అనుగుణంగా వాణిజ్య భాగస్వాములను ఎంచుకునే హక్కు కలిగి ఉంటుందని రష్యా ప్రభుత్వ వార్తా సంస్థ ‘టాస్’కు ఇచ్చిన ఇంటర్వ్యూలో ఆయన నొక్కిచెప్పారు.
ట్రంప్ ఆరోపణలు ఇలా ఉన్నాయి.
రష్యా నుంచి భారత్ భారీ మొత్తంలో చమురు కొనుగోలు చేసి, దానిని బహిరంగ మార్కెట్లో అమ్మి లాభాలు గడిస్తున్నదని సోషల్ మీడియాలో ట్రంప్ ఆరోపించారు. “ఉక్రెయిన్లో రష్యా యుద్ధ యంత్రం వల్ల ఎంత మంది ప్రాణాలు కోల్పోతున్నారన్న దానిపై వారు శ్రద్ధ చూపడం లేదు. అందుకే భారత్పై అమెరికా సుంకాలను గణనీయంగా పెంచుతాను” అని హెచ్చరించారు.
ట్రంప్ వ్యాఖ్యలపై భారత్ ఘాటుగా బదులిచ్చింది.
రష్యా నుంచి చమురు దిగుమతుల విషయంలో అమెరికా తనను లక్ష్యంగా చేసుకోవడం అన్యాయం, అర్థరహితం అని భారత విదేశాంగ శాఖ సోమవారం ప్రకటించింది. దేశ ప్రయోజనాలు, ఆర్థిక భద్రతను కాపాడుకోవడానికి అవసరమైన చర్యలు తీసుకుంటామని స్పష్టం చేసింది. ఉక్రెయిన్ సంక్షోభం తర్వాత సాంప్రదాయ ఇంధన వనరులు యూరప్కు మళ్లడంతో రష్యా నుంచి చమురు దిగుమతులు ప్రారంభించామని గుర్తుచేసింది.
తమను విమర్శిస్తున్న దేశాలే రష్యాతో పెద్ద ఎత్తున వాణిజ్యం చేస్తున్నాయని భారత్ ఎత్తిచూపింది. 2024లో యూరోపియన్ యూనియన్ రష్యాతో 67.5 బిలియన్ యూరోల వస్తు వాణిజ్యం జరిపిందని, 2023లో 17.2 బిలియన్ యూరోల సేవల వాణిజ్యం చేసిందని తెలిపింది. ఇది భారత్-రష్యా వాణిజ్యానికి పోలిస్తే చాలా ఎక్కువ అని స్పష్టం చేసింది. అంతేకాక, అమెరికా కూడా తన అణు పరిశ్రమ కోసం రష్యా నుంచి యురేనియం, ఎలక్ట్రిక్ వాహనాల కోసం పల్లాడియం, ఎరువులు, రసాయనాలు దిగుమతి చేసుకుంటోందని వివరించింది. ఈ నేపథ్యంలో తమను మాత్రమే లక్ష్యంగా చేసుకోవడం సరికాదని భారత్ తేల్చిచెప్పింది.
Read More : సెంట్రల్ కాలిఫోర్నియాలో గిఫోర్డ్ కార్చిచ్చు
One thought on “ట్రంప్ చమురు ఆరోపణలకు ఘాటుగా బదులు”
Comments are closed.