పాస్టర్ ప్రవీణ్ మృతిపై సీబీఐ విచారణ కోరిన కేఏ పాల్ — హైకోర్టులో విచారణ

ఆంధ్రప్రదేశ్‌లో పాస్టర్ ప్రవీణ్ మృతిపై వివాదం మరింత ముదురుతోంది. ఈ ఘటన రోడ్డుప్రమాదమేనని పోలీసులు సీసీ కెమెరా ఫుటేజీ ఆధారంగా స్పష్టం చేసినప్పటికీ, క్రైస్తవ సంఘాలు మాత్రం ఇది యదార్థ ప్రమాదం కాదంటూ తీవ్ర ఆరోపణలు చేస్తూ తీవ్రంగా మండిపడుతున్నాయి.

ఇదే అంశంపై ప్రజాశాంతి పార్టీ అధ్యక్షుడు కేఏ పాల్ హైకోర్టును ఆశ్రయించారు. ప్రవీణ్ మృతి సంఘటనపై సీబీఐ ద్వారా సమగ్ర విచారణ జరిపించాలని డిమాండ్ చేస్తూ పిల్ దాఖలు చేశారు. ఈ పిటిషన్‌పై ఆంధ్రప్రదేశ్ హైకోర్టు ఈ రోజు విచారణ చేపట్టింది.

పాస్టర్ ప్రవీణ్ మరణం ప్రమాదం కాదు, ఇది పక్కా ప్రణాళికతో జరిగిన హత్య అనే ఆరోపణలు తన పిటిషన్‌లో కేఏ పాల్ చేశారు. ప్రమాద ఘటనా స్థలానికి సంబంధించిన సీసీ టీవీ ఫుటేజీలను పోలీసులు మార్ఫింగ్ చేసి విడుదల చేశారని కూడా ఆయన కోర్టుకు వాదనలు వినిపించారు.

ఇక మృతిపై పోలీసుల వైఖరిని తప్పుపడుతూ — ఎస్పీ స్థానికంగా అందరినీ బెదిరించారని, ప్రవీణ్ మద్యం సేవించడంటూ చేసిన ఆరోపణలు అసత్యమని తెలిపారు. అలాగే, ఇప్పటి వరకు పోస్ట్‌మార్టం నివేదికను కూడా ఇవ్వలేదని కోర్టు దృష్టికి తీసుకొచ్చారు.

ఇదిలా ఉండగా, ప్రభుత్వానికి న్యాయస్థానం కీలక ఆదేశాలు జారీ చేసింది. ప్రవీణ్ మృతి ఘటనపై పూర్తి వివరాలను అఫిడవిట్ రూపంలో హైకోర్టుకు సమర్పించాల్సిందిగా సూచించింది.

ఈ కేసులో వాస్తవాలు వెలుగులోకి రావాలంటే స్వతంత్ర విచారణ అవసరమని కేఏ పాల్ స్పష్టం చేశారు. ప్రస్తుతం ఈ పిటిషన్ చుట్టూ ఆంధ్రప్రదేశ్ రాజకీయ వర్గాల్లో ఆసక్తికర చర్చ కొనసాగుతోంది.