శాసనమండలిలో స్పోర్ట్స్ మీట్, ఫొటో సెషన్లో తనకు కుర్చీ కేటాయించకపోవడాన్ని గమనించి మండలి విపక్ష నేత బొత్స సత్యనారాయణ తీవ్ర ఆగ్రహం వ్యక్తం చేశారు. మండలి ఛైర్మన్ను కూడా చిన్నచూపు చూశారని, ఈ వ్యవహారంపై విచారణ జరిపి బాధ్యులపై తగిన చర్యలు తీసుకోవాలని డిమాండ్ చేశారు.
ఫొటో సెషన్లో అవమానం
బొత్స సత్యనారాయణ మాట్లాడుతూ, నిన్నటి స్పోర్ట్స్ మీట్ వేదిక, ద్వారాల వద్ద మండలి ఛైర్మన్ ఫొటోలు లేకపోవడం అవమానకరమన్నారు. మండలి ఛైర్మన్ను కించపరుస్తూ ప్రొటోకాల్ అధికారులు నిర్లక్ష్యంగా వ్యవహరించారని ఆరోపించారు. ఈ వ్యవహారం వల్ల శాసన మండలికి, సభ్యులకు అగౌరవం కలుగుతోందని ఆవేదన వ్యక్తం చేశారు.
పయ్యావుల కేశవ్ స్పందన
ఈ వ్యాఖ్యలపై సభా వ్యవహారాల శాఖ మంత్రి పయ్యావుల కేశవ్ స్పందించారు. భారత రాజ్యాంగ ప్రకారం మండలి ఛైర్మన్ అత్యున్నత స్థానంలో ఉంటారని, ఆయనకు ప్రభుత్వం ఎప్పుడూ చిన్నచూపు చూడలేదని స్పష్టం చేశారు. ముఖ్యమంత్రి చంద్రబాబు, ఉప ముఖ్యమంత్రి సహా మంత్రులు మండుటెండలో 10 నిమిషాల పాటు మండలి ఛైర్మన్ కోసం వేచి ఉన్నారని తెలిపారు.
లోకేష్ వివరణ
మంత్రి నారా లోకేష్ కూడా ఈ అంశంపై స్పందిస్తూ, శాసన మండలి సభ్యులను ఎవరినీ అవమానించే ఉద్దేశం తమకు లేదని స్పష్టం చేశారు. మండలి ఛైర్మన్కు తమకు అపార గౌరవం ఉందని తెలిపారు. ఉప ముఖ్యమంత్రి పవన్ కళ్యాణ్కు కుర్చీ వేయడాన్ని అధికారులు తప్పుగా మర్చిపోయారని, తాము చెప్పిన తర్వాత కుర్చీ ఏర్పాటు చేసి ఫొటో దిగినట్లు వివరించారు.
ఇటీవల చోటుచేసుకున్న ఈ ఘటనపై సీరియస్గా విచారణ జరిపి బాధ్యులపై తగిన చర్యలు తీసుకుంటామని మంత్రి లోకేష్ హామీ ఇచ్చారు.
One thought on “శాసన మండలిలో వివాదం: అవమానిస్తున్నారంటూ విపక్ష నేత బొత్స ఆగ్రహం”
Comments are closed.