ఢిల్లీ సెంట్రల్ సెక్రటేరియట్ భవనంలో భారీ అగ్ని ప్రమాదం

ఢిల్లీ జనపథ్ రోడ్డులో ఉన్న కామన్ సెంట్రల్ సెక్రటేరియట్ (CCS) భవనంలో శనివారం ఉదయం అగ్ని ప్రమాదం సంభవించింది. ఈ ఘటనతో భవనం నిండా మంటలు వెదజల్లాయి. సమాచారం అందుకున్న వెంటనే అగ్నిమాపక సిబ్బంది అప్రమత్తమై సంఘటనా స్థలానికి చేరుకున్నారు. ప్రమాద స్థితిని అదుపులోకి తీసుకువచ్చేందుకు 13 అగ్నిమాపక వాహనాలు రంగంలోకి దిగి మంటలను ఆర్పేందుకు శ్రమిస్తున్నాయి.

ప్రమాదం సంభవించిన సమయంలో భవనంలో కొంత మంది ఉద్యోగులు ఉండగా, వారిని సురక్షిత ప్రాంతాలకు తరలించారు. ఇప్పటివరకు ఎలాంటి ప్రాణ నష్టం సంభవించలేదని అధికారులు తెలిపారు. మంటల తీవ్రతను దృష్టిలో ఉంచుకుని భారీ స్థాయిలో సహాయక చర్యలు కొనసాగుతున్నాయి. ప్రమాదానికి గల కారణాలు ఇంకా స్పష్టంగా తెలియరాలేదు. అయితే, షార్ట్ సర్క్యూట్ వల్లనే ఈ అగ్ని ప్రమాదం జరిగి ఉండొచ్చని అధికారులు అనుమానిస్తున్నారు.

ప్రస్తుతం భవనం మొత్తం పొగతో నిండి ఉండటంతో అగ్నిమాపక సిబ్బందికి మంటల అదుపులో కొన్ని అవరోధాలు ఎదురవుతున్నాయి. భద్రతా కారణాల వల్ల జనపథ్ రోడ్డులో ట్రాఫిక్‌ను కూడా తాత్కాలికంగా నిలిపివేశారు. ఈ ఘటనపై పూర్తి వివరాలు ఇంకా వెల్లడికావలసి ఉంది. అధికారులు పరిస్థితిని ఎప్పటికప్పుడు సమీక్షిస్తూ సహాయక చర్యలను వేగవంతం చేస్తున్నారు.

Read More : AI-171 ప్రమాదంపై కేంద్రం సమగ్ర దర్యాప్తు కమిటీ ఏర్పాటు