ఆంధ్రప్రదేశ్ ముఖ్యమంత్రి చంద్రబాబు నాయుడు ప్రభుత్వ సేవలపై ప్రజల అభిప్రాయాలను స్వయంగా సమీక్షిస్తూ కీలక ప్రకటనలు చేశారు. జూన్ 12 తర్వాత రాష్ట్రవ్యాప్తంగా ఎప్పుడైనా ఆకస్మిక తనిఖీలు జరగబోతున్నట్లు ఆయన వెల్లడించారు. ప్రజలకు అందుతున్న రేషన్, దీపం, ఆర్టీసీ, పంచాయతీ సేవలపై సమీక్ష చేపట్టిన సీఎం, సేవల నాణ్యతపై ప్రజల అభిప్రాయాలను అధికారులు విశ్లేషించారు.
ప్రతి శాఖ పనితీరుపై స్పష్టత
ఈ సందర్భంగా సీఎం మాట్లాడుతూ, కూటమి ప్రభుత్వం ఏర్పడి ఏడాది కావస్తోందని, అందుకే ప్రతి శాఖ పనితీరులో స్పష్టమైన మార్పు కన్పించాలని పేర్కొన్నారు. కొన్ని శాఖలు మెరుగైన సేవలు అందిస్తున్నా, ఆర్టీసీ వంటి కొన్ని విభాగాల్లో నాణ్యత పెంచాల్సిన అవసరం ఉందని తెలిపారు.
దీపం పథకంలో కొత్త మార్పు
దీపం 2 పథకం పరిధిలో లబ్ధిదారులకు ఏడాదికి మంజూరయ్యే మూడు గ్యాస్ సిలిండర్లకు సంబంధించిన సబ్సిడీ మొత్తాన్ని ముందుగానే లబ్ధిదారుల ఖాతాలో జమ చేస్తామని సీఎం తెలిపారు. అవసరమైన సమయంలో వారు సబ్సిడీతో సిలిండర్ కొనుగోలు చేసుకునే వెసులుబాటు కల్పిస్తామని పేర్కొన్నారు.
రేషన్ నాణ్యతపై ప్రజల అభిప్రాయాలు
74% మంది ఈ నెల రేషన్ తీసుకున్నట్టు చెప్పగా, 76% మంది నాణ్యతపై సంతృప్తి వ్యక్తం చేశారు. పశ్చిమ గోదావరి జిల్లా రేషన్ పంపిణీలో మంచి రికార్డు సాధించినట్లు గుర్తించారు. గ్యాస్ డెలివరీ సమయంలో డబ్బులు డిమాండ్ చేస్తున్నారా అనే ప్రశ్నకు 62% మంది ‘‘కాదు’’ అని సమాధానమిచ్చారు.
ఆర్టీసీ, పంచాయతీ సేవల్లో సమస్యలు
ఆర్టీసీ సేవలపై ప్రయాణికుల అభిప్రాయాలు ఆశించినంత మంచిగా లేవని సీఎం పేర్కొన్నారు. బస్టాండ్లలో తాగునీరు, టాయిలెట్ల నిర్వహణపై అసంతృప్తి వ్యక్తమవుతోంది. తాగునీటిపై 44%, టాయిలెట్లపై 55% మంది ప్రజలు అసంతృప్తి వ్యక్తం చేశారు.
పంచాయతీ సేవల్లో పురోగతి
ఇంటి చెత్త సేకరణపై 60% మంది సంతృప్తిగా ఉన్నారు. గ్రామీణ ప్రాంతాల్లో సేవల నాణ్యత మెరుగైందని గుర్తించారు. డ్వాక్రా మహిళల ద్వారా తడిచెత్త నిర్వహణ చేపట్టి కంపోస్ట్ తయారీ చేపడతామని సీఎం తెలిపారు.
డాటా అనలిటిక్స్ పాత్రపై ముఖ్యమంత్రి దృష్టి
సేవలపై ప్రజల అభిప్రాయాలను విశ్లేషించడంలో డాటా అనలిటిక్స్ కీలకంగా మారుతుందని చంద్రబాబు అన్నారు. ప్రజల ఫీడ్బ్యాక్ ఆధారంగా శాఖలు తమ పనితీరును మెరుగుపరచుకునేలా చర్యలు తీసుకోవాలన్నారు.
ఆకస్మిక తనిఖీలతో అధికారుల్లో ఆందోళన
జూన్ 12 తర్వాత ఆకస్మిక తనిఖీల నిర్ణయం అధికారుల్లో గుబులు రేపుతోంది. ముఖ్యమంత్రి ఆకస్మికంగా విభాగాల పర్యటనలు చేస్తే ప్రజలు నేరుగా ఫిర్యాదు చేసే అవకాశాలున్నాయి. దీంతో అధికారులు ముందుగానే అప్రమత్తమవుతున్నారు.
Read More : ఏపీ కేబినెట్ భేటీకి శ్రీకారం
