వేసవి ఠాణీ పెట్టకుండానే భానుడి భగభగలు ప్రజలను ఉక్కిరిబిక్కిరి చేస్తున్నాయి. కెలెండర్ మార్చికే ఆగిపోయినప్పటికీ, మే నెల తాపాన్ని ముందుగానే చూపిస్తున్నట్లు పరిస్థితి మారింది. ఉదయం తొమ్మిది గంటల నుంచే భాస్కరుడు మండిపడుతున్నాడు. ఇప్పటికే తెలంగాణ, ఆంధ్రప్రదేశ్ రాష్ట్రాల్లో వడగాలులు, పెరుగుతున్న ఉష్ణోగ్రతలు ప్రజలను వేధిస్తున్నాయి.
యూవీ కిరణాల ముప్పు – డేంజర్ బెల్స్ మోగుతున్నాయ్!
వాతావరణశాఖ తాజా నివేదిక ప్రకారం, అతినీలలోహిత (UV) కిరణాల తీవ్రత పెరుగుతోంది. ప్రత్యేకంగా కేరళలో యూవీ ఇండెక్స్ ప్రమాదకర స్థాయికి చేరింది. పలుచోట్ల 11 పాయింట్లకు పైగా నమోదు కావడంతో, చర్మసంబంధిత సమస్యలు, కంటి ఇన్ఫెక్షన్లు, జలుబు, తలనొప్పి, డీహైడ్రేషన్ లాంటి సమస్యలు తలెత్తే అవకాశముంది. అందుకే కేరళ విపత్తు నిర్వహణ సంస్థ ఇప్పటికే రెడ్ అలర్ట్ ప్రకటించింది.
ఈ ప్రభావం కేవలం కేరళకే పరిమితం కాకుండా తెలుగు రాష్ట్రాలపైనా పడే అవకాశం ఉందని వాతావరణ నిపుణులు హెచ్చరిస్తున్నారు. మే నెలలో నమోదయ్యే ఉష్ణోగ్రతలు ఇప్పటికే మార్చిలోనే తాకడం ఆందోళన కలిగిస్తోంది. దీంతో భానుడి ప్రతాపం మరింత పెరిగే సూచనలు కనిపిస్తున్నాయి.
తెలుగు రాష్ట్రాల్లో వేడిగాలుల ప్రభావం
ఇప్పటికే తెలంగాణలో గరిష్ఠ ఉష్ణోగ్రతలు 40 డిగ్రీల మార్కును దాటి 3.3 డిగ్రీలు అధికంగా నమోదవుతున్నాయి. ఉత్తర తెలంగాణ జిల్లాల్లో వడగాలులు తీవ్రమయ్యే అవకాశం ఉండటంతో ప్రజలు అప్రమత్తంగా ఉండాలని వాతావరణ శాఖ సూచించింది. ఆదిలాబాద్, కుమురంభీం, మంచిర్యాల, జగిత్యాల జిల్లాల్లో ఎండలు మరింత తీవ్రమయ్యే అవకాశం ఉందని అంచనా వేస్తున్నారు.
అటు ఆంధ్రప్రదేశ్లోనూ ఇదే పరిస్థితి. రాష్ట్రంలోని అనేక ప్రాంతాల్లో ఉష్ణోగ్రత 40 డిగ్రీల మార్కును దాటి వేడిగాలులు విరుచుకుపడుతున్నాయి. రానున్న రోజుల్లో ఉష్ణోగ్రతలు 42-45 డిగ్రీల వరకు పెరిగే అవకాశముందని వాతావరణ నిపుణులు హెచ్చరిస్తున్నారు.
ఉష్ణతరంగాల నుంచి రక్షణ ఎలా?
- ఉదయం 10 గంటల నుంచి మధ్యాహ్నం 3 గంటల వరకు బహిరంగంగా తిరగకూడదు.
- బయటకు వెళ్లేటప్పుడు టోపీ, గుడ్డలు, సన్గ్లాసెస్ ధరించడం మంచిది.
- శరీరానికి తగినన్ని ద్రవపదార్థాలు అందించుకోవాలి.
- మసాలా, వేడివేడి ఆహారాన్ని తక్కువగా తీసుకోవడం ఉత్తమం.
- డీహైడ్రేషన్ సమస్యలు రాకుండా నిత్యం నీళ్లు, కొబ్బరి నీళ్లు, పండ్ల రసాలు తాగడం మంచిది.
మొత్తంగా…
ఈ వేసవి సాధారణంగా ఉండదని వాతావరణ నిపుణులు హెచ్చరిస్తున్నారు. యూవీ కిరణాల తీవ్రత పెరిగే అవకాశముండటంతో ప్రజలు మరింత అప్రమత్తంగా ఉండాలని సూచిస్తున్నారు. హీట్వేవ్లకు గురికాకుండా తగిన జాగ్రత్తలు తీసుకోవడం చాలా అవసరం. ఈ సమయంలో ప్రతి ఒక్కరూ తమ ఆరోగ్యాన్ని దృష్టిలో పెట్టుకుని చర్యలు తీసుకోవాలి.
