మాజీ ఎమ్మెల్యే వల్లభనేని వంశీ కస్టడీ పిటిషన్‌పై ఎస్సీ, ఎస్టీ కోర్టులో వాదనలు పూర్తయ్యాయి. అయితే, కోర్టు తీర్పును మరో రోజు వాయిదా వేసింది.
గన్నవరం టీడీపీ కార్యాలయం దాడి కేసులో ప్రధాన సాక్షులను కిడ్నాప్ చేసిన ఆరోపణలతో మాజీ ఎమ్మెల్యే వల్లభనేని వంశీ (Former MLA Vallabhaneni Vamshi)పై విచారణ కొనసాగుతోంది. ఈ నేపథ్యంలో, ఆయన కస్టడీ పిటిషన్‌పై ఎస్సీ, ఎస్టీ కోర్టులో గురువారం వాదనలు ముగిశాయి. అయితే, న్యాయస్థానం తుది తీర్పును శుక్రవారానికి వాయిదా వేసింది.
వంశీ తరపు న్యాయవాదులు ఆయన ఆరోగ్య పరిస్థితిని దృష్టిలో ఉంచుకుని జైల్లో ప్రత్యేక ఏర్పాట్లు చేయాలంటూ పిటిషన్ దాఖలు చేశారు. జైలు అధికారులు వంశీని ప్రత్యేక సెల్‌లో ఉంచడంపై న్యాయమూర్తి వివరణ కోరారు. భద్రతా పరమైన కారణాలతోనే ఈ చర్య తీసుకున్నట్లు జైలు సూపరింటెండెంట్ పాల్ కోర్టుకు తెలియజేశారు.
అదేవిధంగా, వంశీ ఆరోగ్య సమస్యల కారణంగా మంచం మాదిరి ఉన్న టేబుల్ ఏర్పాటు చేయాలన్న అభ్యర్థనపై కోర్టు స్పందించింది. దీనిపై నేరుగా జైలు సిబ్బందిని, వైద్యులను సంప్రదించి నిర్ణయం తీసుకుంటామని న్యాయమూర్తి స్పష్టం చేశారు.
ప్రాసిక్యూషన్ వర్గాలు వంశీ విచారణకు కస్టడీ అవసరమని వాదించగా, ఆయన తరపు న్యాయవాదులు 10 రోజులు పైగా జైల్లో ఉన్న నేపథ్యంలో కస్టడీ అనవసరమని స్పష్టం చేశారు. అన్ని వాదనలు పూర్తికావడంతో, తీర్పును శుక్రవారానికి వాయిదా వేస్తున్నట్లు ఎస్సీ, ఎస్టీ కోర్టు వెల్లడించింది.
