తెలంగాణ ముఖ్యమంత్రి రేవంత్ రెడ్డి గత ప్రభుత్వాలపై తీవ్ర విమర్శలు చేశారు. సర్దార్ సర్వాయి పాపన్నగౌడ్ చారిత్రక ఖిలాషాపూర్ కోటను మైనింగ్ లీజుకు ఇచ్చి కాలగర్భంలో కలిపేందుకు ప్రయత్నించారని ఆరోపించారు. ట్యాంక్బండ్ వద్ద పాపన్న విగ్రహానికి శంకుస్థాపన చేసిన అనంతరం ఆయన మాట్లాడారు. పాపన్న గౌడ్ సమాజానికి ఆదర్శప్రాయమైన నాయకుడని, బహుజనుల సామ్రాజ్యాన్ని అందరికీ చేరేలా చేసిన మహనీయుడు అని రేవంత్ రెడ్డి ప్రశంసించారు. చరిత్ర కలిగిన కోటలను రక్షించి చారిత్రక కట్టడాలుగా తీర్చిదిద్దుతామని హామీ ఇచ్చారు.
గాంధీ కుటుంబ త్యాగాలు దేశానికి దిశానిర్దేశం చేశాయని సీఎం గుర్తు చేశారు. ఇందిరా గాంధీ, రాజీవ్ గాంధీ దేశం కోసం ప్రాణాలు అర్పించారని, సోనియా గాంధీ పదవులను త్యజించి ప్రజల అభివృద్ధి కోసం పనిచేశారని అన్నారు. రాహుల్ గాంధీ ఇచ్చిన బీసీలకు 42 శాతం రిజర్వేషన్ల హామీపై విశ్వాసం ఉంచవచ్చని చెప్పారు.
దేశంలో ఏ రాష్ట్రం చేయని విధంగా తెలంగాణలో కులగణన సర్వే నిర్వహించామని, అందులో తప్పులు చూపిస్తే క్షమాపణ చెప్పడానికి సిద్ధంగా ఉన్నానని స్పష్టం చేశారు. రాజకీయ ప్రయోజనాల కోసం సర్వేపై విమర్శలు చేయవద్దని హెచ్చరించారు.
బీసీల రిజర్వేషన్లు కేంద్రంలో ఐదు నెలలుగా పెండింగ్లో ఉన్నాయని, ఎస్సీ, ఎస్టీలతో కలిపి రిజర్వేషన్లు 70 శాతం దాటుతాయని ఆయన అన్నారు. కానీ గత ప్రభుత్వం చేసిన చట్టాలే ఇప్పుడు అడ్డంకిగా మారాయని విమర్శించారు.
Read More : ఓబుళాపురం కేసులో సబితాకు హైకోర్టు నోటీసులు
