ఇంటీరియర్ డిజైనర్ అనే బిరుదుతో భారీ మోసాలకు పాల్పడిన నోటోరియస్ నేరస్తుడు ఎట్టకేలకు పోలీసుల గుప్పెట్లోకి వచ్చాడు. పశ్చిమబెంగాల్కు చెందిన పలాష్ పాల్ (Palash Pal) ఇంటీరియర్ డిజైనింగ్ పేరుతో కొత్త భవనాల యజమానులను లక్ష్యంగా చేసుకుని వంచనకు ఒడిగట్టాడు. ఫేక్ వీడియోలు చూపిస్తూ వర్క్ చేస్తానంటూ నమ్మించి లక్షల రూపాయలు వసూలు చేసి పరారయ్యేవాడు. అయితే అతని నాటకానికి ముగింపు పడింది. నారాయణగూడ పోలీసులు అతడిని అరెస్టు చేసి మరికొన్ని కీలక విషయాలను వెలుగులోకి తెచ్చారు.
ఇంటీరియర్ డిజైనింగ్ పేరుతో భారీ మోసాలు
పలాష్ పాల్ ప్రధానంగా కొత్తగా నిర్మిస్తున్న భవనాలు, కమర్షియల్ ప్రాజెక్టులను టార్గెట్ చేసుకుని మోసాలకు పాల్పడ్డాడు. సైట్ ఓనర్స్ను సంప్రదించి, ఇంటీరియర్ డిజైనింగ్ పనులు చేస్తానని నమ్మబలికి భారీగా డబ్బులు వసూలు చేశాడు. నకిలీ వీడియోలు, ప్రాజెక్ట్ రిఫరెన్స్లతో ఆకట్టుకుని ముందుగా అడ్వాన్స్ తీసుకునేవాడు. అయితే, డబ్బులు చేతిలో పడిన వెంటనే మొబైల్ స్విచ్ ఆఫ్ చేసి మాయమయ్యేవాడు.
మర్డర్ కేసులో నిందితుడు
పలాష్ పాల్ పై ఎస్ఆర్ నగర్ పోలీస్ స్టేషన్లో మర్డర్ కేసు కూడా నమోదు కావడం గమనార్హం. కోర్టు విచారణకు హాజరు కాకపోవడంతో న్యాయస్థానం అతని పై NBW (Non-Bailable Warrant) జారీ చేసింది. మోసాల కేసులతో పాటు అతని పై క్రిమినల్ రికార్డులు బయటకు రావడంతో పోలీసులు మరింత లోతుగా విచారణ చేపట్టారు.
కోటి రూపాయలకు పైగా మోసం
పలాష్ పాల్పై హైదరాబాద్లోని ఎస్ఆర్ నగర్, నారాయణగూడా, శంషాబాద్, రాయదుర్గం పోలీస్ స్టేషన్లలో పలు కేసులు నమోదయ్యాయి. నారాయణగూడలోని నిఖిత్ రెడ్డికి కార్పెంటరీ, వుడ్ వర్క్స్ పేరుతో రూ. 66 లక్షలు తీసుకుని మోసం చేశాడు. అనుమానం వచ్చి బాధితుడు అతన్ని సంప్రదించగా, ఫోన్లు స్విచ్ ఆఫ్ చేసి మరుగునపడ్డాడు. ఫిర్యాదు మేరకు పోలీసులు దర్యాప్తు చేపట్టి చివరకు అతడిని అరెస్టు చేశారు.
పోలీసుల ఆపరేషన్ – విలువైన వస్తువులు స్వాధీనం
పలాష్ను అరెస్టు చేసిన పోలీసులు అతని వద్ద నుంచి 120 గ్రాముల బంగారం, రూ. 40,000 నగదు, పలు ల్యాండ్ రిజిస్ట్రేషన్ డాక్యుమెంట్స్, మొబైల్ ఫోన్లు స్వాధీనం చేసుకున్నారు. అతని అకౌంట్లో ఉన్న రూ. 18.65 లక్షలను పోలీసులు ఫ్రీజ్ చేశారు.
దర్యాప్తులో మరిన్ని మోసాలు వెలుగులోకి వచ్చే అవకాశం
ఇతని మోసపూరిత కార్యకలాపాలపై మరింత లోతుగా దర్యాప్తు జరిపిన పోలీసులు, పలాష్ పాల్ మరికొన్ని రాష్ట్రాల్లోనూ ఇలాంటి మోసాలకు పాల్పడి ఉంటాడని అనుమానిస్తున్నారు. బాధితులు ముందుకు వచ్చి పోలీసులకు ఫిర్యాదు చేయాలని సూచిస్తున్నారు.
One thought on “ఇంటీరియర్ డిజైనర్ పేరుతో భారీ మోసాలు – హైదరాబాద్లో అరెస్టు”
Comments are closed.