విశాఖలో ప్రధాని మోదీ సందేశం

అంతర్జాతీయ యోగా దినోత్సవం సందర్భంగా విశాఖపట్నంలో ఈ ఉదయం (జూన్ 21) జరిగిన జాతీయ కార్యక్రమంలో ప్రధాని నరేంద్ర మోదీ పాల్గొన్నారు. ప్రపంచం అంతా ఉద్రిక్తత, అశాంతి, అస్థిరతతో సతమతమవుతున్న నేపథ్యంలో — యోగా ఒక శాంతి మార్గాన్ని చూపుతోందని ప్రధాని స్పష్టం చేశారు.

“యోగా అంటే విరామ బటన్” అని పేర్కొన్న మోదీ, మానవాళి శ్వాస తీసుకోవడానికి, సమతుల్యం సాధించేందుకు యోగా కీలక పాత్ర పోషిస్తుందని చెప్పారు. “ఇది వ్యక్తిగత సాధన మాత్రమే కాకుండా, ప్రపంచ భాగస్వామ్యానికి దోహదపడే ఒక జీవన మార్గం,” అని ఆయన వ్యాఖ్యానించారు.

విశాఖ ఆర్కే బీచ్‌ పై నిర్వహించిన భారీ కార్యక్రమంలో మూడున్నర లక్షల మందికిపైగా ప్రజలతో కలిసి ప్రధాని కామన్ యోగా ప్రొటోకాల్ (CYDP)లో పాల్గొన్నారు. ఈ సందర్భంగా, యోగా ఆనందం, అంతర్గత శాంతిని పెంపొందించడంలో కీలకమని అన్నారు.

ఈ ఏడాది యోగా దినోత్సవం థీమ్ “మానవాళి కోసం యోగా 2.0” అని ప్రకటించిన ప్రధాని, ఇది అంతర్జాతీయ సమాజానికి ఒక కొత్త శాంతి విధానానికి నాంది కావాలని ఆకాంక్షించారు. “యోగా అనే శబ్దం అర్థం కలయిక – ఇది ప్రపంచాన్ని కలుపుతోంది” అని అన్నారు.

ప్రతి దేశం, ప్రతి సమాజం యోగాను తమ జీవన విధానంగా స్వీకరించాలని మోదీ పిలుపునిచ్చారు. యోగా కేవలం వ్యాయామం మాత్రమే కాదని, అది ఒక సమగ్ర జీవన శైలి అని తెలిపారు. ప్రపంచానికి శాంతి, సహకార మార్గాన్ని చూపించడంలో యోగా పాత్ర అపారమని ప్రధాని మోదీ స్పష్టం చేశారు.

Read More : గాజువాక నుంచి 28 వేల మంది తరలింపు