మంత్రి సీతక్క: బీఆర్‌ఎస్ ప్రభుత్వం రైతులను మోసం చేసింది, కౌషిక్ రెడ్డికి కౌంటర్

రైతు బోనస్ అంశంపై మంత్రి సీతక్క తీవ్ర విమర్శలు చేశారు. బీఆర్ఎస్ ప్రభుత్వం రైతులను మోసం చేసిందని, బోనస్ అందిస్తామనే మాటను నిలబెట్టుకోలేదని ధ్వజమెత్తారు. అసెంబ్లీలో జరిగిన చర్చలో బీఆర్ఎస్ ఎమ్మెల్యే పాడి కౌషిక్ రెడ్డిపై ఆమె తీవ్రంగా స్పందించారు. “తమ్ముడూ, నీ లైఫ్‌ స్టైల్ వేరు, నా లైఫ్‌ స్టైల్ వేరు,” అంటూ కౌంటర్ ఇచ్చారు. ములుగు నియోజకవర్గంలో తాను ప్రజల మధ్య ఉన్నట్లు కౌషిక్ రెడ్డి తిరగలేరని ఘాటుగా స్పందించారు.

“వరి వేస్తే ఉరి అన్నది కేసీఆర్ కాదా?”

రైతులకు బోనస్ కల్పించాల్సిన బాధ్యత బీఆర్ఎస్ ప్రభుత్వం తీసుకోలేదని సీతక్క ఆరోపించారు. “హైదరాబాద్‌లో తిరిగే బీఆర్ఎస్ నేతలకు రైతుల బాధలు ఏమి తెలుసు?” అని ప్రశ్నించారు. “వరి వేస్తే ఉరి” అన్న మాట మాజీ సీఎం కేసీఆర్‌దేనని గుర్తుచేశారు. కాంగ్రెస్ ప్రభుత్వం రైతులకు న్యాయం చేస్తోందని, ఇప్పటివరకు సన్నవడ్లకు రూ.1200 కోట్లు బోనస్ ఇచ్చామని వివరించారు. ఇంకా ఎవరికి అందకపోతే వారికీ అందిస్తామని స్పష్టం చేశారు.

“ఇందిరమ్మ ఆత్మీయ భరోసా రైతు కూలీలకు అండ”

రైతు కూలీల కోసం ఇందిరమ్మ ఆత్మీయ భరోసా ప్రవేశపెట్టామని మంత్రి సీతక్క తెలిపారు. భూమి లేని రైతు కూలీలకు భరోసా పథకం అమలు చేస్తున్నామని చెప్పారు. కొంత భూమి ఉన్న రైతు కూలీలకు కూడా ఆ పథకం వర్తింపజేసే అంశాన్ని పరిశీలిస్తున్నట్లు వివరించారు.

“నేను ప్రజల్లోనే ఉంటా, బీఆర్ఎస్ నేతలు కోటల్లో”

తన నివాసంపై బీఆర్ఎస్ నేతలు అనవసర ఆరోపణలు చేస్తున్నారని మంత్రి సీతక్క స్పష్టం చేశారు. “నేను ప్రభుత్వ క్వార్టర్స్‌లోనే ఉంటున్నా, బీఆర్ఎస్ నేతల్లా కోట్ల రూపాయల విలువైన కోటల్లో నివసించడం లేదు,” అంటూ ధీటుగా సమాధానమిచ్చారు. తను నివసిస్తున్న భవనం వైఎస్ హయాంలో నిర్మించిందని, దాన్ని అదృష్టంగా భావిస్తున్నానని తెలిపారు. బీఆర్ఎస్ ఎమ్మెల్యేలను తమ ఇంటికి రావాలని ఆహ్వానిస్తూ, “వస్తే అన్ని విషయాలు తెలుస్తాయి,” అని అన్నారు.

“బీఆర్ఎస్ నేతలకు నా భోజన ఆహ్వానం”

సీతక్క బీఆర్ఎస్ ఎమ్మెల్యేలకు భోజన ఆహ్వానం పలికారు. “మీరు అధికారంలో ఉన్నప్పుడు మా ఇంటికి రావడానికి ధైర్యం చేయలేదుకానీ, ఇప్పుడు నా ఆహ్వానం స్వీకరించండి,” అని చురకలేశారు. తాను నిరాడంబర జీవితం గడుపుతున్నానని, తన కుమారుడు కూడా హన్మకొండలోనే ఉంటున్నాడని వివరించారు.

Read More : బెట్టింగ్ యాప్స్ ప్రమోషన్ కేసులో యూట్యూబర్ సన్నీ యాదవ్‌పై లుకౌట్ నోటీసులు