గాజాను నియంత్రణలోకి తీసుకునేందుకు ఇజ్రాయెల్ ప్రణాళికలు

ఇజ్రాయెల్-హమాస్ మధ్య దాదాపు 23 నెలలుగా కొనసాగుతున్న యుద్ధం మరో కీలక మలుపు తిరిగింది. గాజా సిటీని పూర్తిగా తమ నియంత్రణలోకి తీసుకునే ప్రణాళికకు ఇజ్రాయెల్ భద్రతా క్యాబినెట్ ఆమోదం తెలిపింది. ఈ మేరకు ప్రధాని కార్యాలయం ఒక ప్రకటన విడుదల చేసింది. ఈ నిర్ణయంతో గాజాలో సైనిక కార్యకలాపాలు మరింత విస్తృతం కానున్నాయి.

గాజాను శాశ్వతంగా ఆక్రమించబోం: ప్రధాని నెతన్యాహు
భద్రతా కేబినెట్ సమావేశానికి ముందు, ప్రధాని బెంజమిన్ నెతన్యాహు కీలక వ్యాఖ్యలు చేశారు. “గాజా మొత్తాన్ని నియంత్రణలోకి తీసుకుని, హమాస్‌ను పూర్తిగా తొలగిస్తాం. అక్కడి ప్రజలకు స్వేచ్ఛ కల్పిస్తాం” అని ఆయన స్పష్టం చేశారు. అయితే, గాజాను శాశ్వతంగా ఆక్రమించే ఉద్దేశం తమకు లేదని, అక్కడ భద్రతా వలయాన్ని ఏర్పాటు చేసి, పాలనా బాధ్యతలను అరబ్ దళాలకు అప్పగిస్తామని నెతన్యాహు వివరించారు.

మానవతా సంక్షోభం తీవ్రం
మరోవైపు, గాజాలో మానవతా సంక్షోభం రోజురోజుకు తీవ్రమవుతోంది. 2023 అక్టోబర్‌లో యుద్ధం మొదలైనప్పటి నుంచి ఇప్పటివరకు 61,258 మంది పాలస్తీనియన్లు మరణించగా, 1,52,045 మంది గాయపడినట్లు అక్కడి ఆరోగ్య అధికారులు తెలిపారు. ఆహారం, నీరు కొరతతో కరవు పరిస్థితులు నెలకొన్నాయి.

సహాయక చర్యలు
మానవతా సహాయం అందించేందుకు యూఏఈ, జోర్డాన్, జర్మనీ, బెల్జియం, ఫ్రాన్స్ దేశాలు విమానాల ద్వారా 107 సహాయక ప్యాకేజీలను గాజాలో జారవిడిచాయి. అయితే, భూమార్గాల ద్వారా సహాయాన్ని అనుమతిస్తే తప్ప, ఈ ఎయిర్‌డ్రాప్స్ పెద్దగా ప్రయోజనం ఉండదని ఐక్యరాజ్యసమితి అధికారులు అభిప్రాయపడుతున్నారు. సహాయక చర్యల కోసం గాజాలోని కొన్ని ప్రాంతాల్లో రోజువారీగా ‘వ్యూహాత్మక విరామం’ పాటిస్తున్నట్లు ఇజ్రాయెల్ సైన్యం ప్రకటించింది.