బీహార్లో రాబోయే అసెంబ్లీ ఎన్నికల ముందు ఉగ్రవాదుల కదలికలు ఆందోళన కలిగిస్తున్నాయి. నిఘా వర్గాల సమాచారం ప్రకారం, పాకిస్థాన్కు చెందిన జైషే మహ్మద్ (జెఇఎం) ఉగ్రవాద సంస్థకు చెందిన ముగ్గురు ఉగ్రవాదులు రాష్ట్రంలోకి ప్రవేశించినట్లు గుర్తించారు. ఈ నేపథ్యంలో బీహార్ పోలీసు యంత్రాంగం రాష్ట్రవ్యాప్తంగా హై అలర్ట్ ప్రకటించింది. ప్రస్తుతం బీహార్ పర్యటనలో ఉన్న కాంగ్రెస్ నేత రాహుల్ గాంధీ భద్రతను కూడా మరింత కట్టుదిట్టం చేశారు. పోలీసుల వివరాల ప్రకారం, రావల్పిండికి చెందిన హస్నైన్ అలీ, ఉమర్కోట్కు చెందిన ఆదిల్ హుస్సేన్, బహవల్పూర్కు చెందిన మహ్మద్ ఉస్మాన్ అనే ముగ్గురు ఉగ్రవాదులు నేపాల్ సరిహద్దు మార్గంగా గత వారం బీహార్లోకి చొరబడ్డారు. వారి ఫోటోలు, సమాచారం అన్ని జిల్లాల పోలీసులకు పంపించబడింది.
నేపాల్తో 729 కిలోమీటర్ల సరిహద్దు కలిగిన జిల్లాలు, సీమాంచల్ ప్రాంతంలో భద్రతను కట్టుదిట్టం చేశారు. రైల్వే స్టేషన్లు, బస్ స్టేషన్లు, జనసమ్మర్థ ప్రదేశాల్లో కఠిన తనిఖీలు జరుగుతున్నాయి. సరిహద్దు చెక్పోస్టుల్లో పెట్రోలింగ్ను పెంచారు. అనుమానాస్పద వ్యక్తులపై ప్రజలు వెంటనే పోలీసులకు సమాచారం అందించాలని విజ్ఞప్తి చేశారు.
అసెంబ్లీ ఎన్నికలు సమీపిస్తున్న తరుణంలో ఈ పరిణామం ఆందోళన కలిగిస్తోంది. గమనించదగ్గ విషయం ఏమిటంటే, గత మే నెలలో కూడా బీహార్లో 18 మంది అనుమానితులను పట్టుకోగా, వారిలో ఒకరు ఖలిస్థాన్ సానుభూతిపరుడిగా తేలింది.
Read More : ద్రాస్లో ప్రమాదం: కిరణ్ రిజిజు సిబ్బంది ఇద్దరిని రక్షించారు
One thought on “బీహార్లో ఉగ్రవాదుల చొరబాటు.. రాష్ట్రవ్యాప్తంగా హై అలర్ట్”
Comments are closed.