అమరావతిలో సీఎం చంద్రబాబు సొంతిల్లు నిర్మాణానికి శంకుస్థాపన సిద్ధం..

ఆంధ్రప్రదేశ్ రాజధాని అమరావతిలో ముఖ్యమంత్రి నారా చంద్రబాబు నాయుడు స్వయంగా నివాసం కోసం గృహ నిర్మాణానికి శ్రీకారం చుడుతున్నారు. రేపు (ఏప్రిల్ 9) ఆయన కుటుంబ సభ్యులతో కలిసి నిర్మాణ పనులకు శంకుస్థాపన చేయనున్నారు. ఈ వేడుక వెలగపూడి సచివాలయం వెనుక ఈ9 రహదారి పక్కనున్న చంద్రబాబు సొంత భూమిలో జరగనుంది.

అమరావతిని రాజధానిగా ప్రకటించిన 2014 తర్వాత, చంద్రబాబు పాలనను ఇదే ప్రాంతం నుంచి నడిపించారు. అయితే తన నివాస నిర్మాణంపై అప్పట్లో దృష్టి పెట్టలేదు. తిరిగి 2024లో ముఖ్యమంత్రి పదవిలోకి వచ్చిన ఆయన, అమరావతిని అత్యున్నత రాజధానిగా అభివృద్ధి చేయాలనే సంకల్పంతో మరిన్ని నిర్మాణాలను వేగవంతం చేస్తున్నారు.

స్వయంగా ఇల్లు నిర్మించుకోవడం ద్వారా రాజధాని రైతులకు భరోసా కలిగించేందుకు చంద్రబాబు ఈ కీలక నిర్ణయం తీసుకున్నట్లు భావిస్తున్నారు. గతంలో భూములు ఇచ్చిన రైతులు ఎదుర్కొన్న సమస్యలను గుర్తు చేస్తూ, ఇప్పుడు సీఎం స్వయంగా ఇక్కడ నివాసం ఏర్పాటు చేసుకోవడంపై వారు సంతోషం వ్యక్తం చేస్తున్నారు.

కేంద్ర నిధుల మంజూరు, ప్రముఖ సంస్థల స్థాపన, వేగంగా జరుగుతున్న అభివృద్ధి పనుల నేపథ్యంలో అమరావతిలో సానుకూల వాతావరణం ఏర్పడినట్టు విశ్లేషకులు చెబుతున్నారు. చంద్రబాబు నివాస నిర్మాణంతో రాజధాని ప్రాంతానికి మరింత నూతన శోభ చేకూరనుందని ప్రజాభిప్రాయం.

Read More : ఏపీ లో వాట్సాప్ గవర్నెన్స్ పై ప్రత్యేక డ్రైవ్ – ఇంటింటికీ అవగాహన కార్యక్రమం