టాలీవుడ్ మెగాస్టార్ చిరంజీవి అరుదైన గౌరవాన్ని అందుకున్నారు. సినీ రంగానికి ఆయన చేసిన విశేష సేవలకు గాను ‘లైఫ్టైమ్ అచీవ్మెంట్ అవార్డు’ను చిరంజీవి స్వీకరించారు. యూకేకి చెందిన అధికార లేబర్ పార్టీ పార్లమెంట్ సభ్యుడు నవేందు మిశ్రా ఆయనకు ఈ పురస్కారాన్ని అందజేశారు.
పవన్ ట్వీట్
ఈ సందర్భంగా చిరంజీవిని అభినందిస్తూ ఆయన తమ్ముడు, ఏపీ ఉపముఖ్యమంత్రి పవన్ కళ్యాణ్ స్పందించారు. ట్విట్టర్ వేదికగా ఆయన భావోద్వేగపూరితంగా స్పందించారు.
“మీ తమ్ముడిగా పుట్టినందుకు గర్వంగా ఉంది. జీవిత సాఫల్య పురస్కారం అన్నయ్య గారి కీర్తిని మరింత పెంచుతుంది. నేను చిరంజీవి గారిని అన్నయ్యగా కంటే తండ్రి సమానుడిగా భావిస్తాను. జీవితం ఎలా సాగించాలో తెలియని అయోమయ సమయంలో నాకు మార్గం చూపిన వ్యక్తి ఆయన. భవిష్యత్తులో మరిన్ని పురస్కారాలు అందుకుని అందరికీ మార్గదర్శిగా నిలవాలని కోరుకుంటున్నాను” అని పవన్ ట్వీట్ చేశారు.
పవన్ ప్రశంసలు
పవన్ కళ్యాణ్ చిరంజీవి సినీ ప్రయాణాన్ని గుర్తుచేశారు. “సాధారణ మధ్యతరగతి ఎక్సైజ్ కానిస్టేబుల్ కొడుకుగా తన జీవితం ప్రారంభించి, స్వశక్తితో మెగాస్టార్గా ఎదిగి నాలుగు దశాబ్దాలుగా కోట్లాది మంది అభిమానులను అలరిస్తూ మెరుగైన నటనతో 9 ఫిలింఫేర్ అవార్డులు, 3 నంది అవార్డులు అందుకున్నారు. అందుకే ఆయన నటనకు పర్యాయపదంగా నిలిచారు” అని పేర్కొన్నారు.
సేవా కార్యక్రమాల్లో చిరంజీవి
“నా జీవితానికి హీరో అన్నయ్య చిరంజీవి. ఆయన సేవా భావంతో ‘చిరంజీవి చారిటబుల్ ట్రస్ట్’ స్థాపించి రక్తదానం, నేత్రదానం వంటి కార్యక్రమాల ద్వారా కోట్లాది మందిని సమాజ సేవకు ప్రేరేపించారు. తాను ఎదగడమే కాకుండా ఎంతో మందిని ప్రోత్సహించారు. టాలెంట్ ఉన్న ఎవరైనా సరే ఏ రంగంలో అయినా రాణించవచ్చని నిరూపించారు” అని పవన్ కొనియాడారు.
పద్మవిభూషణ్ ఘనత
“భారత ప్రభుత్వం చిరంజీవికి ఇటీవల పద్మవిభూషణ్ పురస్కారాన్ని ప్రదానం చేసింది. ఈ అరుదైన పురస్కారాన్ని అందుకుని ఆయన అందరికీ గర్వకారణంగా నిలిచారు. ఇప్పుడు లైఫ్టైమ్ అచీవ్మెంట్ అవార్డు అందుకోవడం ఎంతో ఆనందంగా ఉంది” అని పవన్ అన్నారు.
ఈ పురస్కార కార్యక్రమానికి హోస్ట్గా వ్యవహరించిన నవేందు మిశ్రాకు పవన్ కళ్యాణ్ ప్రత్యేక ధన్యవాదాలు తెలిపారు.
https://twitter.com/PawanKalyan/status/1902575183405457832
One thought on “అన్నకు అవార్డు.. తమ్ముడి గర్వం”
Comments are closed.