అనంతపురం: భారీ అగ్ని ప్రమాదం, బస్సులు దగ్ధం
అనంతపురం నగరంలో గురువారం తెల్లవారుజామున భారీ అగ్ని ప్రమాదం చోటు చేసుకుంది. ఈ ప్రమాదంలో జేసీ దివాకర్ రెడ్డికి చెందిన ప్రైవేట్ ట్రావెల్స్ బస్సులు దగ్ధమయ్యాయి. అనంతపురం ఆర్టీసీ బస్టాండ్ సమీపంలో ఈ ఘటన జరిగింది. బస్సులపై కేవీ 11 వైర్ తెగిపడి నిప్పురవ్వలు పడటంతో మంటలు ఎగసిపడ్డాయి.
దట్టమైన పొగలు చుట్టుప్రక్కల వ్యాపించడంతో భయాందోళనకు గురైన స్థానికులు వెంటనే పోలీసులు మరియు అగ్నిమాపక సిబ్బందికి సమాచారం ఇచ్చారు. ఘటనా స్థలానికి చేరుకున్న అగ్నిమాపక సిబ్బంది మంటలను అదుపులోకి తీసుకువచ్చారు. ఈ ప్రమాదంలో నాలుగు బస్సులు పూర్తిగా దగ్ధమయ్యాయి. అయితే, ప్రమాద సమయంలో బస్సుల వద్ద ఎవరూ లేకపోవడంతో పెను ప్రమాదం తప్పింది. ఈ ఘటనలో ఎలాంటి ప్రాణాపాయం లేకపోవడం అధికారులు ఊరటగా భావించారు.
తిరుపతిలో స్టీల్ ఫ్యాక్టరీ అగ్ని ప్రమాదం
ఇదే విధంగా, తిరుపతి జిల్లా పెళ్లకూరు మండలం పెన్నేపల్లి వద్ద ఎంఎస్ అగర్వాల్ స్టీల్ ఫ్యాక్టరీలో బుధవారం రాత్రి భారీ అగ్ని ప్రమాదం జరిగింది. పరిశ్రమలోని ఫర్నేస్ బాయిలర్లో ప్రమాదం సంభవించి పెద్ద శబ్దంతో పేలిపోయింది. ఈ ఘటనలో అక్కడ పని చేస్తున్న ఏడుగురు కార్మికులు తీవ్ర గాయాలపాలయ్యారు. గాయపడ్డ వారిని నాయుడుపేట మరియు నెల్లూరు ఆస్పత్రులకు తరలించారు.
ప్రమాద విషయం తెలుసుకున్న వెంటనే పోలీసులు మరియు అగ్నిమాపక సిబ్బంది ఘటనా స్థలానికి చేరుకుని మంటలను అదుపు చేసేందుకు ప్రయత్నించారు. అయితే, స్టీల్ ఫ్యాక్టరీ యాజమాన్యం వివరాలను గోప్యతగా ఉంచడంతో పరిస్థితి ఇంకా అయోమయంగా మారింది. రాత్రి షిఫ్ట్లో 50-70 మంది కార్మికులు పని చేస్తున్నారని సమాచారం. వీరిలో ఎక్కువ మంది బీహార్ వాసులని స్థానికులు తెలిపారు.
ఈ రెండు ఘటనలపై పూర్తి వివరాలు తెలియాల్సి ఉంది.
