దిల్లీ: పార్కులు, ఆటస్థలాలు అందుబాటులో లేకపోవడం భారతదేశం, బంగ్లాదేశ్ వంటి దేశాల్లో టీనేజర్లలో శారీరక చురుకుదనాన్ని తగ్గించడమే కాకుండా, ధనిక దేశాల్లో ఆ వయసు యువతీ-యువకుల్లో సోషల్ మీడియా వాడకం కారణంగా అలసత్వం పెరుగుతోందని ఒక అధ్యయనంలో తేలింది.
భారతదేశంలో టీనేజర్లు సరాసరిగా తమ పడకగదిలో 1.2 ఎలక్ట్రానిక్ వస్తువులు, 0.5 మొబైల్ ఫోన్ వంటి వ్యక్తిగత ఎలక్ట్రానిక్ వస్తువులు కలిగి ఉన్నారని మద్రాస్ డయాబెటిస్ రిసెర్చ్ ఫౌండేషన్ నిర్వహించిన అధ్యయనం వెల్లడించింది. అదే డెన్మార్క్లో ఒక్కొక్క యువకుడు 4.2 ఎలక్ట్రానిక్ వస్తువులు, 2.3 వ్యక్తిగత ఎలక్ట్రానిక్ వస్తువులు కలిగి ఉన్నట్లు కనిపించింది.
భారత్, బంగ్లాదేశ్లలో కిశోర ప్రాయంలో ఉన్న 30% మంది మాత్రమే వ్యక్తిగత సోషల్ మీడియా అకౌంట్లు కలిగి ఉన్నారు. కానీ సామాజిక, ఆర్థికంగా అభివృద్ధి చెందిన దేశాల్లో ఇదే వయో వర్గం 90% మంది యువతీ-యువకులు సోషల్ మీడియా అకౌంట్లను కలిగి ఉన్నారు.
ఈ అధ్యయనం కోసం 11 నుంచి 19 ఏళ్ల వయస్సు ఉన్న నాలుగు వేల మందికి సంబంధించిన యాక్సిలరోమీటర్ (శారీరక క్రియాశీలతను, వేగాన్ని కొలిచే యంత్రం) డేటాను సేకరించారు. 14 దేశాలలో 6,300 యువతుల శారీరక చురుకుదనంపై చేసిన సర్వే ఫలితాలను ఉపయోగించారు.
“టీవీ, మొబైల్ స్క్రీన్పై గడిపే సమయాన్ని తగ్గించేలా కౌమారావస్థలోని యువతీ-యువకులను ప్రోత్సహించేందుకు తల్లిదండ్రులు, విధాన నిర్ణేతలు, సాంకేతిక పరిజ్ఞాన సంస్థలు కలిసి పనిచేయాలి. వారిలో ఆరోగ్యకరమైన శారీరక అలవాట్లను పెంపొందించి భవిష్యత్తులో దీర్ఘకాలిక రోగాలకు దూరంగా ఉంచవచ్చు,” అని అధ్యయన పత్ర రచయిత రంజిత్ మోహన్ అంజనా పేర్కొన్నారు.
