ఎగుమతిదారులకు ఊరట కల్పించేందుకు పీఎంవో హై లెవల్ సమావేశం

భారతదేశం నుంచి దిగుమతి అయ్యే వస్తువులపై అమెరికా విధించే సుంకాలను రెట్టింపు చేస్తూ వాషింగ్టన్ కీలక నిర్ణయం తీసుకుంది. ఈ కొత్త సుంకాలు ఆగస్టు 28 నుంచి అమల్లోకి రానున్నాయి. ప్రస్తుతం 25 శాతం సుంకం ఉన్న చోట, ఇప్పుడు 50 శాతం సుంకం విధించబోతోంది.

ఈ పరిణామం నేపథ్యంలో, ఇప్పటికే ఒత్తిడిని ఎదుర్కొంటున్న భారతీయ ఎగుమతిదారులు తీవ్ర ఆందోళన వ్యక్తం చేస్తున్నారు. అమెరికా మార్కెట్లో పోటీ చేయడం కష్టమవుతోందని వారు వాణిజ్య మంత్రిత్వశాఖకు తెలిపారు. దీనికి పరిష్కారం కోసం ప్రధానమంత్రి కార్యాలయం (PMO) ఆగస్టు 26న ఉన్నత స్థాయి సమావేశం ఏర్పాటు చేసింది. ఈ సమావేశానికి ప్రధానమంత్రి ముఖ్య కార్యదర్శి అధ్యక్షత వహించే అవకాశం ఉంది.

సహాయం కోసం పథకాలపై చర్చ

కరోనా కాలంలో అమలులోకి వచ్చిన ఎమర్జెన్సీ క్రెడిట్ లైన్ గ్యారెంటీ స్కీమ్ తరహా పథకం రూపకల్పనపై చర్చ జరుగుతుందని తెలుస్తోంది. ప్రత్యేకంగా నష్టపోయే రంగాలను గుర్తించి, లక్ష్యబద్ధంగా ఆర్థిక సాయం అందించాలనే ప్రభుత్వ ఆలోచన ఉంది.

ముఖ్యంగా చిన్న, మధ్యతరహా పరిశ్రమలు ఎక్కువ ప్రభావితమవుతున్నందున, వీటికి వర్కింగ్ క్యాపిటల్ ఫండ్స్ అందించే అంశంపై కూడా ఆలోచన జరుగుతోంది. “ఆస్తుల ఆధారంగా రుణాలు అందిస్తే మైక్రో పరిశ్రమలకు ఊరట కలుగుతుంది” అని సంబంధిత అధికారులు తెలిపారు.

ఈ సమావేశంలో ప్రభుత్వం ఎగుమతిదారులకు తీసుకోబోయే నిర్ణయాలపై స్పష్టత వచ్చే అవకాశం ఉంది. ఎగుమతిదారుల సమస్యలపై కేంద్రం ప్రాధాన్యతనిస్తూ తీసుకునే చర్యలు రాబోయే రోజుల్లో కీలకంగా మారనున్నాయి.

Read More : గణేష్ చతుర్థి: లాల్ బాగ్చా రాజా కొత్త లుక్ విడుదల