రేషన్ కార్డుల జారీపై దరఖాస్తుదారుల ఆవేదన… హామీని నిలబెట్టుకోవాలని డిమాండ్

జనవరి 26 గణతంత్ర దినోత్సవాన్ని పురస్కరించుకొని, జిల్లాలోని 31 గ్రామాల్లో కొత్త రేషన్ కార్డులను పంపిణీ చేశారు. మొత్తం 1,066 కుటుంబాలకు ఈ కార్డులు అందజేశారు. అయితే, అప్పటికే జిల్లా వ్యాప్తంగా 81,148 మంది కొత్త కార్డుల కోసం దరఖాస్తు చేసుకున్నారు. ఈ లెక్కన దాదాపు 80 వేల మందికి పైగా దరఖాస్తుదారులు ఇప్పటికీ తమకు రేషన్ కార్డు ఎప్పుడొస్తుందనే ఆవేదన వ్యక్తం చేస్తున్నారు.

ఎమ్మెల్సీ ఎన్నికల కోడ్ కారణంగా కొత్త కార్డుల పంపిణీకి బ్రేక్ పడిందని అధికారులు పేర్కొన్నప్పటికీ, ఇప్పుడు ఆ కోడ్ ముగిసిన తర్వాత కూడా రేషన్ కార్డుల పంపిణీ నిలిచిపోవడంపై దరఖాస్తుదారులు అసంతృప్తి వ్యక్తం చేస్తున్నారు. ఏ సంక్షేమ పథకానికైనా రేషన్ కార్డు ప్రామాణికంగా మారిన నేపథ్యంలో కొత్త కార్డుల జారీపై డిమాండ్ మరింత బలంగా వినిపిస్తోంది.

మార్పులు, చేర్పులపై స్పందన లేకపోవడంపై అసంతృప్తి

గత ఎనిమిదేళ్లుగా రేషన్ కార్డుల్లో మార్పులు, చేర్పుల కోసం పౌర సరఫరాల శాఖ పలుమార్లు దరఖాస్తులు స్వీకరించినప్పటికీ పెద్దగా మార్పులు జరగలేదని స్థానికులు ఆరోపిస్తున్నారు. కొత్తగా పెళ్లి చేసుకుని అత్తవారింటికి వచ్చిన వారి పేర్లు రేషన్ కార్డుల్లో చేర్చాల్సి ఉందని, అలాగే పిల్లల పేర్లను కూడా చేర్చాల్సిన అవసరం ఉందని దరఖాస్తుదారులు పేర్కొంటున్నారు.

ఈ అంశంపై ‘సాక్షి’ పౌర సరఫరాల శాఖ అధికారులను సంప్రదించగా, తమకు ఎలాంటి సమాచారం అందలేదని వారు వెల్లడించారు. ప్రభుత్వం నుంచి స్పష్టత వచ్చే వరకు తాము ఏమీ చెప్పలేమని తెలిపారు.

హామీని నిలబెట్టుకోవాలని డిమాండ్

ప్రభుత్వం కొత్త రేషన్ కార్డులను జారీ చేస్తామని ప్రజలకు ఇచ్చిన హామీని నిలబెట్టుకోవాలని దరఖాస్తుదారులు డిమాండ్ చేస్తున్నారు. ఎన్నికలకు ముందు ఒక విధంగా, తర్వాత మరో విధంగా నిర్ణయాలు మారుతుండటంపై వారు అసంతృప్తి వ్యక్తం చేస్తున్నారు. కొత్త కార్డుల జారీతో పాటు మార్పులు, చేర్పుల ప్రక్రియ కూడా వేగంగా పూర్తి చేయాలని మాజీ సర్పంచ్ తోకల నర్సయ్య ప్రభుత్వాన్ని కోరారు.