బీజేపీ కొత్త అధ్యక్షుడిపై ఎమ్మెల్యే రాజాసింగ్ ఘాటు వ్యాఖ్యలు – పార్టీ నేతలపై తీవ్ర విమర్శలు

తెలంగాణలో భారతీయ జనతా పార్టీ (BJP) నాయకత్వ మార్పు చర్చనీయాంశంగా మారిన నేపథ్యంలో గోషామహల్ ఎమ్మెల్యే రాజాసింగ్ (MLA Raja Singh) చేసిన వ్యాఖ్యలు రాజకీయ వర్గాల్లో తీవ్ర దుమారం రేపుతున్నాయి. కొత్త బీజేపీ అధ్యక్షుడి ఎంపికపై ఆయన సంచలన వ్యాఖ్యలు చేయడం గమనార్హం.

శనివారం మీడియాతో మాట్లాడిన రాజాసింగ్, రాష్ట్ర బీజేపీ కమిటీ నిర్ణయించిన నేత రబ్బర్ స్టాంప్‌గా మారే అవకాశముందని సంచలన వ్యాఖ్యలు చేశారు. ఒకవేళ కొత్త అధ్యక్షుడిని కేంద్ర కమిటీ ఎంపిక చేస్తే, అది మంచి పరిణామంగా ఉంటుందని అభిప్రాయపడ్డారు. గతంలో రాష్ట్ర బీజేపీ అధ్యక్షులుగా వ్యవహరించిన వారు గ్రూపిజాన్ని ప్రోత్సహించి పార్టీకి తీవ్ర నష్టం కలిగించారని ఆరోపించారు. పార్టీ కోసం పనిచేసిన సీనియర్ నాయకులు, ఉద్యమకారులను పక్కనబెట్టడం వల్లే తెలంగాణలో బీజేపీ బలహీనపడిందని విమర్శించారు.

నూతన అధ్యక్షుడి ఎంపికపై కీలక వ్యాఖ్యలు

తెలంగాణ బీజేపీకి కొత్త అధ్యక్షుడు వచ్చిన వెంటనే గ్రూపు రాజకీయాలు కొనసాగితే, అది పార్టీ భవిష్యత్తుకు హానికరమని రాజాసింగ్ హెచ్చరించారు. రాష్ట్రంలోని బీజేపీ ఎమ్మెల్యేలు, ఎంపీలకు పూర్తి స్వేచ్ఛ కల్పించాలి, అప్పుడే తెలంగాణలో బీజేపీ ప్రభుత్వాన్ని ఏర్పాటు చేసే అవకాశముంటుందని అన్నారు. ముఖ్యమంత్రితో రహస్యంగా సమావేశాలు జరిపే అధినేతను పార్టీ అంగీకరించదని స్పష్టం చేశారు.

‘హిందుత్వమే బీజేపీ సిద్ధాంతం’

బీజేపీ హిందుత్వ విధానానికి కట్టుబడి ఉండాలని, ధర్మం కోసం పనిచేసే కార్యకర్తలను గుర్తించి, వారికి ప్రాధాన్యత ఇవ్వాలని రాజాసింగ్ డిమాండ్ చేశారు. గతంలో సీనియర్ నాయకులు, ఉద్యమకారులను పక్కనబెట్టడాన్ని తాను స్వయంగా చూశానని, ఇకపై అలాంటి పరిస్థితి రాకూడదని సూచించారు.

‘నా మాట ఎవరికైనా నచ్చకపోయినా సమస్య లేదు’

తన వ్యాఖ్యలు ఎవరికైనా నచ్చకపోయినా, పార్టీ కేడర్ ఆలోచనలను బయటపెట్టడమే తన లక్ష్యమని రాజాసింగ్ స్పష్టం చేశారు. తనపై కొందరు కావాలనే తప్పుడు ప్రచారం చేస్తున్నారని ఆరోపిస్తూ, ఏదైనా సమస్య ఉంటే పార్టీ నేతల వద్ద చర్చించాలని, మీడియా ద్వారా విమర్శలు చేయడం సరికాదని సూచించారు. ఈ విషయాన్ని గతంలోనే పార్టీ పెద్దల దృష్టికి తీసుకెళ్లానని, కానీ వారు స్పందించకపోవడంతో ప్రజల ముందు మాట్లాడాల్సిన పరిస్థితి వచ్చిందని వివరించారు.

తెలంగాణ బీజేపీలో మార్పులు రావాలన్న రాజాసింగ్ వ్యాఖ్యలు ప్రస్తుతం పెద్ద చర్చనీయాంశంగా మారాయి. కొత్త అధ్యక్షుడి నియామకంతో పార్టీ భవిష్యత్తు ఎలా ఉండబోతుందన్నదానిపై ఉత్కంఠ కొనసాగుతోంది.

Read More : దక్షిణాది రాష్ట్రాల సమావేశం: ఒకే వేదికపై సీఎం రేవంత్, కేటీఆర్ – తెలంగాణ రాజకీయాల్లో చర్చనీయాంశం