నాగర్కర్నూల్ జిల్లా నాగనూలులోని కస్తూర్బా గాంధీ బాలికల పాఠశాలలో తీవ్ర ఉద్రిక్తత నెలకొంది. పాఠశాలలో విధులు నిర్వహిస్తున్న ఇంగ్లీష్ టీచర్ కళ్యాణి నుంచి తాము అనుచిత ప్రవర్తనకు, మానసిక వేధింపులకు గురవుతున్నామని విద్యార్థినులు ఆవేదన వ్యక్తం చేశారు.
ఈ వేధింపులను తీవ్రంగా ఎదుర్కొంటున్న విద్యార్థినులు, తరగతులను బహిష్కరించి పాఠశాల ఆవరణలో ఎండలో కూర్చుని నిరసనకు దిగారు. ‘‘మేడమ్ మమ్మల్ని టార్చర్ చేస్తుంది, స్నానం చేస్తున్న సమయంలో ఫోటోలు తీసి ఇతరులకు పంపుతుంది, పాఠాలు చదవలేకపోతే గొంతు పట్టుకొని పైకి లేపుతుంది,’’ అంటూ కన్నీటి లోపల తమ బాధను వెలిబుచ్చారు.
ఇలాంటి వేధింపుల నేపథ్యంలో పది రోజుల క్రితమే, 9వ తరగతి విద్యార్థిని యామిని తీవ్ర మనస్తాపానికి గురై చేతి నరాలు కోసుకొని ఆత్మహత్యాయత్నానికి పాల్పడిన ఘటన తీవ్ర సంచలనం సృష్టించింది. అయినప్పటికీ ఇప్పటివరకు టీచర్ కళ్యాణిపై అధికారులు ఎలాంటి కఠిన చర్యలు తీసుకోకపోవడం గమనార్హం.
ఈ పరిస్థితితో తీవ్ర అసంతృప్తికి లోనైన విద్యార్థినులు, బోర్డు పరీక్షలు సమీపిస్తున్నప్పటికీ, దాదాపు మూడు గంటలుగా నిరసనలో కొనసాగుతున్నారు. ‘‘కళ్యాణి మేడమ్ను సస్పెండ్ చేసే వరకు మేము తరగతులకు హాజరుకాలేము. తినకుండా ఎండలో కూర్చుని మా ఉద్యమాన్ని కొనసాగిస్తాం’’ అని స్పష్టంగా తెలిపారు.
విద్యార్థినుల ఆరోపణలు ప్రజల్లో తీవ్ర చర్చలకు దారి తీసిన నేపథ్యంలో, అధికారులు తక్షణమే స్పందించి న్యాయం చేయాలని తల్లిదండ్రులు, స్థానికులు కోరుతున్నారు.
Read More : ఎమ్మెల్సీ కవిత కాంగ్రెస్ నాయకులకు, అధికారులకు హెచ్చరిక
2 thoughts on “నాగర్కర్నూల్ కస్తూర్బా పాఠశాలలో టీచర్ వేధింపులపై విద్యార్థినుల ధర్నా”
Comments are closed.