వరలీ మెట్రో స్టేషన్ జలమయం… జనజీవనం స్తంభనం.

దేశ ఆర్థిక రాజధాని ముంబైలో రుతుపవనాలు ఎప్పటి కంటే ముందే ఎంట్రీ ఇచ్చి తీవ్ర కలకలం రేపాయి. ఆదివారం రాత్రి నుంచి సోమవారం ఉదయం వరకు కురిసిన భారీ వర్షాల కారణంగా నగరం తడిసి ముద్దైంది. పలు ప్రాంతాలు నీట మునిగిపోయాయి. రోడ్లు చెరువులను తలపించగా, ట్రాఫిక్ పూర్తిగా స్తంభించింది.

వర్లీ మెట్రో స్టేషన్ నీటమునిగిన దృశ్యాలు వైరల్

ఇటీవలే ప్రారంభమైన వర్లీ అండర్‌గ్రౌండ్ మెట్రో స్టేషన్ పూర్తిగా నీటితో మునిగిపోయింది. ప్లాట్‌ఫారాలు, ఎంట్రెన్స్ గేట్లు వరకూ బురద నీరు నిండిపోయాయి. ప్రయాణికులు చెప్పులు చేతిలో పట్టుకుని, trouser లను మడుచుకుని నీటిలో నడవాల్సిన పరిస్థితి ఏర్పడింది. స్టేషన్ పైకప్పు నుంచి నీరు కారుతున్న దృశ్యాలు బయటకు రాగా, నీటి మళ్లింపునకు సరైన డ్రైనేజీ సదుపాయాలు లేకపోవడం ఈ పరిస్థితికి కారణమని భావిస్తున్నారు.

మే 10న ప్రారంభించబడిన ముంబై మెట్రో లైన్-3 (ఆక్వా లైన్)లో వర్లి స్టేషన్ భాగం. కానీ ప్రారంభించిన నెల కూడా కాకముందే దీనిని ఎగతాళి చేయడం నిర్మాణ నాణ్యత గురించి అనేక ప్రశ్నలను లేవనెత్తుతోంది. ఈ వీడియోలు సామాజిక మాధ్యమాల్లో వైరల్ అయ్యాయి. ఒక నెటిజన్ ఎక్స్ (ట్విట్టర్) వేదికగా వ్యాఖ్యానిస్తూ, “ఆక్వా లైన్ అని పేరు పెట్టినప్పుడే ఇది నీటిలో మునిగిపోతుందనుకోవాలి” అంటూ వ్యంగ్యంగా స్పందించారు.

కుంగిన రోడ్డు… వాహనాల రాకపోకలకు ఆంక్షలు

దక్షిణ ముంబైలోని ప్రముఖ కెంప్స్ కార్నర్ ప్రాంతంలో రోడ్డు భాగం కుంగిపోవడంతో ఆ ప్రాంతంలో ట్రాఫిక్‌కు అంతరాయం ఏర్పడింది. అధికారులు వాహనాలను వార్డెన్ కలెక్షన్ వద్ద నిలిపి, యూ టర్న్ తీసుకొని ఫ్లైఓవర్ మీదుగా మళ్లిస్తున్నారు. ప్రజలను ప్రత్యామ్నాయ మార్గాలు ఉపయోగించాల్సిందిగా సూచించారు.

ప్రభుత్వ చర్యలపై ఎదురుదెబ్బ

ఈ వర్షాలు ముంబై మునిసిపల్‌శాఖ మౌలిక సదుపాయాలపై మరొకసారి విమర్శలు రేపుతున్నాయి. నూతనంగా ప్రారంభించిన మెట్రో స్టేషన్ ఇలా నీట మునగడం ప్రభుత్వానికి షాక్ ఇచ్చే విషయంగా మారింది. ప్రజల భద్రత, మెట్రో వ్యవస్థ విశ్వసనీయతపై ప్రశ్నలు తలెత్తుతున్నాయి.

Read More : దేశవ్యాప్తంగా భారీ వర్షాలకు వాతావరణ శాఖ హెచ్చరికలు.