‘జాక్’ మూవీ రివ్యూ

‘డీజే టిల్లు’, ‘టిల్లు స్క్వేర్’ వంటి సినిమాలతో యూత్‌లో బోలెడంత క్రేజ్ సంపాదించిన నటుడు సిద్ధు జొన్నలగడ్డ తాజా చిత్రం ‘జాక్‌’ ప్రేక్షకుల ముందుకు వచ్చింది. ‘బొమ్మరిల్లు’ భాస్కర్ దర్శకత్వం వహించిన ఈ యాక్షన్ డ్రామాలో వైష్ణవి చైతన్య కథానాయికగా నటించారు. ట్రైలర్‌లో సిద్ధు మార్క్ డైలాగ్‌లు సినిమాపై ఆసక్తి పెంచినా, థియేటర్లలో మాత్రం ఈ చిత్రం ఆశించిన స్థాయిలో మెప్పించలేకపోయింది.

కథలోకి వెళితే
రా ఏజెంట్ కావాలనే కలలుగన్న జాక్‌ (సిద్ధు) ఉగ్రవాదులను అడ్డుకోవాలనే లక్ష్యంతో ఓ మిషన్‌లో ఉంటాడు. అనుకోకుండా రా ఏజెంట్ మనోజ్‌ (ప్రకాశ్ రాజ్)ను తన అదుపులోకి తీసుకుంటాడు. మరోవైపు తన తండ్రి నియమించిన డిటెక్టివ్ కుమార్తె (వైష్ణవి) జాక్‌ను ఫాలో అవుతూ, అతని జీవితంలోకి ప్రవేశిస్తుంది. ఇందులో ఉత్కంఠతో పాటు ప్రేమకథ కూడా మిళితమవుతుంది. చివరికి జాక్‌కు రా ఏజెంట్ జాబ్ దక్కిందా లేదా అన్నది కథ ముగింపు.

విశ్లేషణ
ఈ చిత్రం ప్రారంభంలోనే ఇది ఓ రొటీన్ కథ అని స్పష్టమవుతుంది. ఉగ్రవాదం, స్పై యాంగిల్‌తో ఇప్పటివరకు ఎన్నో సినిమాలు వచ్చిన నేపథ్యంలో, కథలో కొత్తదనం లేకపోవడం చిత్రానికి పెద్ద మైనస్ అయ్యింది. సిద్ధు పాత్రను కూడా దర్శకుడు ఆకట్టుకునేలా డిజైన్ చేయకపోవడం మరో నెగటివ్ పాయింట్.

ఫస్ట్‌ హాఫ్ చాలా స్లోగా సాగగా, సెకండాఫ్ అంతకుమించి నీరసంగా కొనసాగుతుంది. భాస్కర్ Previous track record‌ని బట్టి ప్రేక్షకులు ఓ ఫ్రెష్ కథ, బలమైన స్క్రీన్‌ప్లే ఆశించగా, ఈ సినిమా వాటి నుంచి పూర్తిగా తేడాగా ఉంది.

పనితీరు & టెక్నికల్‌ అంగాలు
సిద్ధు తన స్థాయిలో నటించినా కథ బలహీనంగా ఉండటం వల్ల ఆయన నటనకు పెద్దగా గుర్తింపు రాలేదు. వైష్ణవికి స్కోప్ లేకపోయింది. కెమెరామన్ విజయ్ కె. చక్రవర్తి విజువల్స్, సామ్ సిఎస్ సంగీతం మంచి అండగా నిలిచినా కథలో బలం లేకపోవడంతో అవి పెద్దగా ఉపయోగపడలేదు.

మొత్తానికి, సిద్ధు తన ఎంటర్‌టైన్‌మెంట్ జోనర్‌ను పక్కన పెట్టి, కొత్తదనం లేని కథతో ప్రయోగం చేయడం ఆయన కెరీర్‌కు అడ్డంకిగా మారే అవకాశముంది. ప్రేక్షకుల అంచనాల్ని అందుకోలేకపోయిన ‘జాక్‌’ చిత్రం విజయాన్ని అందుకోవడంలో విఫలమైందని చెప్పవచ్చు.

Read More : థ్రిల్లర్ సినిమాతో మమ్ముట్టి రీ ఎంట్రీ