ఓవల్ టెస్టులో భారత యువ జట్టు సంచలనం

ఓటమి అంచున నిలిచిన మ్యాచ్‌లో భారత యువ జట్టు అద్భుతమైన పునరాగమనం చేసింది. ఓవల్ మైదానంలో జరిగిన ఐదో టెస్టులో మహమ్మద్ సిరాజ్ నిప్పులు చెరిగే బౌలింగ్‌తో ఐదు వికెట్లు పడగొట్టడంతో భారత్ 6 పరుగుల తేడాతో ఇంగ్లండ్‌పై ఉత్కంఠ భరిత విజయాన్ని నమోదు చేసింది. ఈ గెలుపుతో ఐదు మ్యాచ్‌ల ఆండర్సన్-టెండూల్కర్ ట్రోఫీని 2-2తో సమం చేస్తూ సిరీస్‌ను నిలబెట్టుకుంది.

సిరాజ్ ధాటికి ఇంగ్లండ్ కుప్పకూలింది
మ్యాచ్ చివరి రోజు ఆట ప్రారంభానికి ఇంగ్లండ్ విజయానికి కేవలం 35 పరుగులు మాత్రమే అవసరం కాగా, చేతిలో నాలుగు వికెట్లు ఉన్నాయి. అయితే కెప్టెన్ శుభ్‌మన్ గిల్ నేతృత్వంలోని భారత బౌలర్లు అసాధారణ పట్టుదలతో ఆతిథ్య జట్టును కట్టడి చేశారు. సిరాజ్ ఉదయం సెషన్‌లోనే జేమీ స్మిత్, జేమీ ఓవర్టన్ కీలక వికెట్లు తీసి మ్యాచ్ గమనం మార్చేశాడు.

ప్రసిద్ధ్ కృష్ణ సంధించిన 141 కిమీ వేగంతో వచ్చిన యార్కర్‌కు జోష్ టంగ్ స్టంప్స్ ఎగిరిపోవడం మ్యాచ్‌లో టర్నింగ్ పాయింట్‌గా మారింది. 347/6 వద్ద ఉన్న ఇంగ్లండ్ 354/9కి కుప్పకూలింది. చివరి వికెట్ కోసం పోరాడిన గస్ అట్కిన్సన్ (17)ను కూడా సిరాజ్ ఔట్ చేయడంతో భారత జట్టు చిరస్మరణీయ విజయాన్ని అందుకుంది.

సిరాజ్-ప్రసిద్ధ్ బౌలింగ్‌తో విజయం
ఈ మ్యాచ్‌లో సిరాజ్ ఐదు వికెట్లు, ప్రసిద్ధ్ కృష్ణ నాలుగు వికెట్లు తీయడం భారత్ విజయానికి ప్రధాన కారణమైంది. అంతకుముందు భారత్ తొలి ఇన్నింగ్స్‌లో 224 పరుగులు, రెండో ఇన్నింగ్స్‌లో యశస్వి జైస్వాల్ (118) సెంచరీతో 396 పరుగులు చేసింది. ఇంగ్లండ్ 247, 367 పరుగులు చేసి ఆలౌట్ అయింది.

రోహిత్ శర్మ, విరాట్ కోహ్లీ వంటి సీనియర్లు లేకపోయినా యువ జట్టు సాధించిన ఈ విజయం సిరీస్‌లో హైలైట్‌గా నిలిచింది. నిన్న నాలుగో రోజు బ్రూక్స్ క్యాచ్ వదిలి విమర్శలు ఎదుర్కొన్న సిరాజ్, ఇవాళ ఐదో రోజు తన అద్భుత బౌలింగ్‌తో మ్యాచ్ హీరోగా నిలవడం విశేషం.