దేశంలో ఎన్నికల ప్రక్రియను మరింత పారదర్శకంగా మార్చే దిశగా కేంద్ర ఎన్నికల సంఘం (ECI) కీలక నిర్ణయం తీసుకుంది. గత ఆరేళ్లుగా ఏ ఎన్నికల్లోనూ పోటీ చేయని, క్రియారహితంగా ఉన్న 334 రాజకీయ పార్టీల రిజిస్ట్రేషన్ను రద్దు చేస్తున్నట్లు శనివారం ప్రకటించింది.
నిబంధనల ఉల్లంఘన కారణంగా రద్దు:
ఎన్నికల సంఘం నిబంధనల ప్రకారం, నమోదైన పార్టీలు క్రమం తప్పకుండా ఎన్నికల్లో పాల్గొనాలి. అయితే, 2019 నుంచి ఈ 334 పార్టీలు ఏ ఎన్నికలోనూ తమ అభ్యర్థులను నిలబెట్టలేదు. అంతేకాకుండా, క్షేత్రస్థాయి పరిశీలనలో ఈ పార్టీలు తమ చిరునామాలలో భౌతికంగా లేవని తేలింది. ఈ రెండు ప్రధాన నిబంధనలను ఉల్లంఘించినందువల్లే వీటిపై వేటు వేసినట్లు ఈసీ స్పష్టం చేసింది.
ప్రక్షాళన తర్వాత తగ్గిన పార్టీల సంఖ్య
- ఈ ప్రక్షాళన చర్యకు ముందు దేశంలో 2,854 రిజిస్టర్డ్ గుర్తింపు లేని పార్టీలు ఉండేవి.
- తాజా నిర్ణయంతో ఆ సంఖ్య 2,520కి తగ్గింది.
ఈ నిర్ణయం కేవలం గుర్తింపు లేని, క్రియారహితంగా ఉన్న పార్టీలకు మాత్రమే వర్తిస్తుందని ఈసీ తెలిపింది. ప్రస్తుతం దేశంలో ఉన్న 6 జాతీయ పార్టీలు, 67 రాష్ట్ర స్థాయి పార్టీల కార్యకలాపాలపై దీని ప్రభావం ఉండదని స్పష్టం చేసింది. ఎన్నికల వ్యవస్థలో జవాబుదారీతనం పెంచేందుకు భవిష్యత్తులోనూ ఇలాంటి చర్యలు కొనసాగుతాయని ఈసీ వర్గాలు సూచించాయి.
Read More : వెబ్ సిరీస్ ప్రభావంతో బాలుడి ఆత్మహత్య
