నోబెల్ బహుమతిపై ట్రంప్ అసంతృప్తి వ్యాఖ్యలు

అమెరికా మాజీ అధ్యక్షుడు డొనాల్డ్ ట్రంప్ తనకు నోబెల్ శాంతి బహుమతి లభించకపోవడంపై అసంతృప్తిని వ్యక్తం చేశారు. “నాకూ నోబెల్ బహుమతి రావాలి. కానీ, నోబెల్ కమిటీ ఉదారవాదులకే బహుమతులు ఇస్తుంది. నాలాంటి వారిని ఎన్నుకుంటే ఆశ్చర్యమే” అంటూ తన నిర్వేదాన్ని బయటపెట్టారు.

పాకిస్థాన్ ప్రభుత్వం 2026 నోబెల్ శాంతి బహుమతికి ట్రంప్‌ను అధికారికంగా నామినేట్ చేసిన కొద్దిసేపటికే ఆయన ఈ వ్యాఖ్యలు చేశారు. గతంలో భారత్-పాకిస్థాన్ మధ్య ఉద్రిక్తతలను తగ్గించేందుకు, అలాగే కాంగో-రువాండా, సెర్బియా-కొసోవో లాంటి ప్రాంతాల్లో తాను కీలక దౌత్య ప్రయత్నాలు చేశానని ట్రంప్ అన్నారు. “ఈ కృషికి ఇప్పటికే నాలుగైదుసార్లు నోబెల్ శాంతి బహుమతి రావాలి. నేను చేసిన దానిని చూసిన వాళ్లెవరైనా అంగీకరించక తప్పదు” అని పునరుద్ఘాటించారు.

సోమవారం రోజున ట్రంప్ కాంగో-రువాండా మధ్య శత్రుత్వాలను ముగించేందుకు ఓ శాంతి ఒప్పందాన్ని సూచించినట్లు సమాచారం. అయితే, ఈ ఒప్పందానికి సంబంధించిన పూర్తి వివరాలు ఇంకా బయటపడలేదు.

నోబెల్ శాంతి బహుమతిని నార్వేకు చెందిన నోబెల్ కమిటీ ఏటా ప్రదానం చేస్తుంది. ప్రపంచ శాంతికి దోహదపడే వ్యక్తులు లేదా సంస్థలను ఎంపిక చేసి ఈ గౌరవాన్ని అందజేస్తుంది. ట్రంప్‌ను నామినేట్ చేసిన విషయంపై నోబెల్ కమిటీ మాత్రం ఇప్పటివరకు ఎలాంటి వ్యాఖ్య చేయలేదు. ట్రంప్ వ్యాఖ్యలు రాజకీయ వర్గాల్లో ఆసక్తికర చర్చకు దారితీశాయి.

Read More : ఇరాన్ అణు కేంద్రాలపై ఇజ్రాయెల్ దాడులు