పహల్గామ్ ఉగ్రదాడి అనంతరం భారత్, పాకిస్తాన్ల మధ్య ఉద్రిక్తతలు పెరిగిపోతున్నాయి. భారత్ ప్రతీకార చర్యలకు సిద్ధమవుతోందనే ఊహాగానాలతో పాకిస్తాన్ హడలిపోతున్న పరిస్థితి. ఇదిలా ఉండగా, పౌరులకు అవగాహన కల్పించేందుకు కేంద్రం కీలక నిర్ణయం తీసుకుంది. ఈ నెల 7వ తేదీ బుధవారం దేశవ్యాప్తంగా సివిల్ డిఫెన్స్ మోక్ డ్రిల్ నిర్వహించనున్నట్లు ప్రకటించింది. ఇందుకోసం అన్ని రాష్ట్రాలు, కేంద్ర పాలిత ప్రాంతాలకు కేంద్ర హోంశాఖ ఇప్పటికే ఉత్తర్వులు జారీ చేసింది.
మోక్ డ్రిల్లో ముఖ్య అంశాలు ఇవే:
ఈ డ్రిల్లో శత్రుదేశాల వైపు నుంచి యుద్ధ ముప్పు లేదా ఆకస్మిక దాడులు జరిగితే, పౌరులు తమను తాము ఎలా రక్షించుకోవాలో వివరించనున్నారు.
- వైమానిక దాడులకు సంబంధించి హెచ్చరికల కోసం సైరన్లు మోగించనున్నారు
- ఇండియన్ ఎయిర్ ఫోర్స్తో హాట్లైన్ మరియు రేడియో కమ్యూనికేషన్ వ్యవస్థలను టెస్ట్ చేస్తారు
- కంట్రోల్ రూములు, షాడో కంట్రోల్ రూములు ఏర్పాటు చేసి సిబ్బందిని నియమించనున్నారు
- విద్యార్థులు, పౌరులకు ఆత్మరక్షణ పాఠాలు అందిస్తారు
- ఆకస్మికంగా విద్యుత్ సరఫరా నిలిపివేసే క్రాష్ బ్లాక్అవుట్ నిర్వహిస్తారు
- దేశానికి కీలకమైన ప్లాంట్లు, సంస్థలపై శత్రువుల కన్ను పడకుండా కామోఫ్లేజింగ్ చర్యలు చేపడతారు
- బంకర్లు, కందకాలు శుభ్రపరచడం, పౌర రక్షణ తరలింపు ప్రణాళికలను అమలుచేసి పరీక్షిస్తారు
ఈ డ్రిల్ ముఖ్య ఉద్దేశం దేశ పౌరుల్లో అప్రమత్తత పెంచడం, అత్యవసర సమయంలో వారు తీసుకోవాల్సిన జాగ్రత్తలను ప్రాక్టికల్గా అర్థం చేయించడమేనని అధికారులు వెల్లడించారు.
ఇలాంటి అవగాహన కార్యక్రమాలు దేశ భద్రతను మరింత బలోపేతం చేయడంలో సహాయపడతాయని విశ్లేషకులు అభిప్రాయపడుతున్నారు.
Read More : జమ్మూ కశ్మీర్ భద్రతపై పిటిషన్పై సుప్రీంకోర్టు తీవ్ర ఆగ్రహం
