హైదరాబాద్ పార్లమెంట్ సభ్యుడు, మజ్లిస్ అధ్యక్షుడు అసదుద్దీన్ ఒవైసీ ఆర్ఎస్ఎస్ భావజాలంపై తీవ్ర విమర్శలు చేశారు. భారత రాజ్యాంగానికి భవిష్యత్లో ఆర్ఎస్ఎస్ భావజాలంతోనే ముప్పు పొంచి ఉందని ఆయన ఆందోళన వ్యక్తం చేశారు. దేశంలో మత సామరస్యానికి ఎలాంటి ముప్పు లేదని, కానీ బీజేపీ, ప్రధాన మంత్రి నరేంద్ర మోదీ, ఉత్తరప్రదేశ్ సీఎం యోగి ఆదిత్యనాథ్ వల్లే ప్రమాదం ఉందని వ్యాఖ్యానించారు.
రంజాన్ మాసం చివరి శుక్రవారం జుమ్మాతుల్ విదా ప్రార్థనల అనంతరం ఫతే దర్వాజా వజీర్ అలీ మసీదులో జరిగిన యౌముల్ ఖురాన్ కార్యక్రమంలో ప్రసంగించిన ఆయన, కేంద్ర ప్రభుత్వం రాజ్యాంగ విరుద్ధంగా వక్ఫ్ సవరణ బిల్లును ప్రవేశపెట్టిందని ఆరోపించారు. బీజేపీ ప్రభుత్వానికి మద్దతుగా నిలిచిన తెలుగుదేశం అధినేత చంద్రబాబు నాయుడు, జేడీయూ నేత నీతీష్ కుమార్, ఎల్జేపీ నేత చిరాగ్ పాశ్వాన్, ఆర్ఎల్డీ నేత జయంత్ చౌధరిలను భారతీయ ముస్లింలు విశ్వసించరని స్పష్టం చేశారు.
వక్ఫ్ సవరణ చట్టానికి మద్దతు ఇచ్చిన నేతలను ముస్లింలు ఎప్పటికీ క్షమించరని ఒవైసీ హుశారుగా ప్రకటించారు. దేవాలయాల ట్రస్టు బోర్డుల్లో హిందువులు, గురుద్వారా బోర్డుల్లో సిక్కులు మాత్రమే సభ్యులుగా ఉండాలనే నిబంధనలు అమలవుతుండగా, వక్ఫ్ బోర్డుల్లో ముస్లిమేతరుల ప్రమేయాన్ని ఎలా అంగీకరిస్తారని ప్రశ్నించారు.
ఈ బిల్లుకు వ్యతిరేకంగా ఆల్ ఇండియా ముస్లిం పర్సనల్ లా బోర్డు ఇచ్చిన పిలుపు మేరకు ఒవైసీ సహా ముస్లిం సముదాయానికి చెందిన వారు నల్ల బ్యాడ్జీలు ధరించి నిరసన వ్యక్తం చేశారు. బీజేపీ, ఆర్ఎస్ఎస్ భావజాలం దేశ సమగ్రతకు ముప్పుగా మారుతుందంటూ ఒవైసీ ఘాటు విమర్శలు చేశారు.
Read More : కంచే-గచ్చిబౌలి ప్రభుత్వ భూముల అమ్మకంపై కేటీఆర్ తీవ్ర అభ్యంతరం
One thought on “ఆర్ఎస్ఎస్ భావజాలంతో దేశానికి ముప్పు: అసదుద్దీన్ ఒవైసీ”
Comments are closed.