టాటా గ్రూప్ మరోసారి తమ సామాజిక బాధ్యతను చాటుకుంది. ఇటీవల జరిగిన ఎయిరిండియా విమానం ఏఐ 171 ప్రమాదంతో ప్రభావితమైన బాధిత కుటుంబాలను ఆదుకునేందుకు టాటా సన్స్ కీలక నిర్ణయం తీసుకుంది. ఈ విమాన ప్రమాదంలో ప్రాణాలు కోల్పోయిన 271 మందికి అండగా నిలిచేందుకు రూ. 500 కోట్లతో ప్రత్యేక ట్రస్ట్ ఏర్పాటు చేయనున్నట్లు తెలుస్తోంది.
ఈ ప్రతిపాదనను గురువారం జరిగిన టాటా సన్స్ బోర్డు సమావేశంలో ఆమోదించారు. టాటా సన్స్ ఛైర్మన్ ఎన్. చంద్రశేఖరన్ ఈ ట్రస్ట్ ఏర్పాటుకు పునాది వేసి, ఎయిరిండియా యొక్క రోజువారీ కార్యకలాపాలను స్వయంగా పర్యవేక్షించనున్నారు. ఈ ట్రస్ట్ను త్వరలోనే అధికారికంగా రిజిస్టర్ చేసి, దేశ-విదేశాల్లో ఉన్న బాధిత కుటుంబాలకు నేరుగా సహాయం అందించే ప్రక్రియ ప్రారంభించనుంది. ఈ ట్రస్ట్కు టాటా మోటార్స్ సీఎఫ్ఓ పీబీ బాలాజీ నేతృత్వం వహించనున్నారు.
ఈ నిధులతో, మృతుల కుటుంబాలకు నష్టపరిహారం, క్షతగాత్రులకు వైద్య సహాయం, ప్రమాద ప్రాంతంలోని మెడికల్ కాలేజీ పునరుద్ధరణ, విమాన శకలాల వల్ల కలిగిన ఆస్తి నష్ట పరిహారం వంటి అంశాలను ట్రస్ట్ చురుకుగా నిర్వహించనుంది. అలాగే, మిగిలిన నిధిని బాధిత కుటుంబాల భవిష్యత్ అవసరాల కోసం వినియోగించనున్నారు.
ఈ మేరకు గతంలో 1989లో టాటా స్టీల్లో అగ్నిప్రమాదం సమయంలో జేఆర్డీ టాటా, 26/11 ముంబయి దాడుల సమయంలో రతన్ టాటా వ్యక్తిగతంగా బాధ్యతలు తీసుకున్న ఉదాహరణలను గుర్తు చేస్తూ, ఇప్పుడు చంద్రశేఖరన్ అదే ధోరణిలో ముందుకొచ్చారు. సంక్షోభ సమయంలో సంస్థ బాధ్యతగా వ్యవహరించాల్సిన సందర్భాన్ని టాటా గ్రూప్ మరోసారి సమర్థంగా నిర్వర్తించనుంది.
Read More : సిబిల్ స్కోర్ తక్కువగా ఉండటంతో ఉద్యోగం రద్దు.
One thought on “Tata Group : రూ.500 కోట్ల ట్రస్ట్ ఏర్పాటు”
Comments are closed.