టీమిండియా స్టార్ బ్యాటర్ శ్రేయస్ అయ్యర్కు ఈ మధ్య కాలంలో ఫైనల్స్ బాధ్యతగా మారాయి. కేవలం పది రోజుల వ్యవధిలోనే రెండు కీలక టి20 టోర్నీల ఫైనల్స్లో అతడి సారథ్యంలోని జట్లు ఓటమి పాలయ్యాయి. ఐపీఎల్ 2025 ఫైనల్లో రాయల్ ఛాలెంజర్స్ బెంగళూరుతో జరిగిన పోరులో పంజాబ్ కింగ్స్ జట్టు ఓటమి చెందగా, తాజాగా ముంబయి టీ20 లీగ్ ఫైనల్లోనూ శ్రేయస్ జట్టుకు నిరాశే ఎదురైంది.
వాంఖడే స్టేడియంలో జరిగిన ఈ టైటిల్ పోరులో శ్రేయస్ అయ్యర్ కెప్టెన్సీలోని సోబో ముంబయి ఫాల్కన్స్ జట్టు ముంబయి సౌత్ సెంట్రల్ మరాఠా రాయల్స్ చేతిలో ఓడిపోయింది. టాస్ గెలిచి ముందుగా బ్యాటింగ్ చేసిన ఫాల్కన్స్ 157 పరుగులు మాత్రమే చేసింది. మయూరేశ్ తాండేల్ (50 నాటౌట్), హర్ష్ అఘవ్ (45 నాటౌట్) రాణించడంతో కొంత మెరుగైన స్కోరు సాధ్యమైంది. అయితే కెప్టెన్ అయ్యర్ మాత్రం మరోసారి నిరాశ పరిచాడు. 17 బంతుల్లో కేవలం 12 పరుగులు మాత్రమే చేశాడు. కేకేఆర్ తరఫున ఆడే అంక్రిశ్ రఘువంశీ కూడా పెద్దగా ప్రభావం చూపలేకపోయాడు.
158 పరుగుల లక్ష్యాన్ని చేధించడంలో మరాఠా రాయల్స్ జట్టు ఆత్మవిశ్వాసంతో ఆడింది. చిన్మయ్ రాజేశ్ సుతార్ (53), అవేస్ ఖాన్ నౌషాద్ (38) కీలక ఇన్నింగ్స్లు ఆడటంతో నాలుగు బంతులు మిగిలి ఉండగానే విజయం సాధించింది. దీంతో సిద్ధేశ్ లాడ్ సారథ్యంలోని మరాఠా రాయల్స్ ముంబయి టీ20 లీగ్ 2025 టైటిల్ను గెలుచుకుంది.
ఈ ఫైనల్ మ్యాచ్ను టీమిండియా కెప్టెన్ రోహిత్ శర్మ ప్రత్యక్షంగా వీక్షించాడు. మ్యాచ్ అనంతరం శ్రేయస్ అయ్యర్కు రన్నరప్ మెడల్ను రోహిత్ అందజేశాడు. టోర్నీలో వ్యక్తిగతంగా కూడా అయ్యర్ పెద్దగా రాణించలేదు. ఆడిన ఐదు మ్యాచ్లలో ఒక్క దాంట్లోనూ 25 పరుగులు దాటలేకపోయాడు.
ఫైనల్లో ఓటమిపై స్పందించిన అయ్యర్ తన నిరాశను వ్యక్తం చేశాడు. ఎవ్వరినీ నిందించడం తన ధోరణి కాదని, టోర్నీ మొత్తంలో జట్టు చక్కగా ఆడిందని అన్నాడు. “ఫైనల్లో ఓటమి నిరాశ కలిగిస్తుంది. కానీ తదుపరి సీజన్లో మరింత ఉత్సాహంతో తిరిగి వస్తాం” అని ఆశాభావం వ్యక్తం చేశాడు.
ఈ విధంగా కొద్ది రోజుల్లోనే రెండు కీలక ఫైనల్స్ ఓడిపోవడంతో శ్రేయస్ అయ్యర్పై మరోసారి ఆస్తిత్వ పరీక్ష కొనసాగుతోంది.
Read More : తొలి రోజే 14 వికెట్లు.. పైచేయి ఆసీస్కే!
One thought on “ఒకే పది రోజుల్లో రెండు ఫైనల్స్లో ఓటమి: Iyer”
Comments are closed.