శ్రీ విష్ణు కామెడీ ప్రయోగం ఎంతవరకు సక్సెస్ అయ్యిందో?

సినీ నటుడు శ్రీ విష్ణు ప్రధాన పాత్రలో నటించిన యూత్‌ఫుల్ ఎంటర్‌టైనర్ ‘సింగిల్’ ఈ శుక్రవారం ప్రేక్షకుల ముందుకు వచ్చింది. ఎటువంటి సినీ నేపథ్యం లేకుండా హీరోగా రాణిస్తున్న శ్రీ విష్ణు, ఈ సినిమాతో కామెడీ జోనర్‌లో మరోసారి తన అదృష్టాన్ని పరీక్షించుకున్నాడు. అయితే ఈ చిత్రం ప్రేక్షకుల అంచనాలను అందుకుందా? చూడదగిన వినోదం అందించిందా? చూద్దాం..

కథా సారాంశం:
విజయ్ (శ్రీ విష్ణు) ఒక బ్యాంకులో ఇన్సూరెన్స్ ప్రతినిధిగా పనిచేస్తుంటాడు. ప్రేమ కోసం ఎదురు చూస్తూ ఉండే అతడు, పూర్వ (కేతికా శర్మ)ను చూసి మొదటి చూపులోనే ప్రేమలో పడతాడు. ఆమెను దగ్గర కావాలనే ఉద్దేశంతో కార్ షోరూమ్‌కు వెళ్లి కారు కొంటానంటాడు. చివరికి ప్రేమను వ్యక్తపరచగానే పూర్వ అతడిని మోసం చేశాడని భావిస్తుంది. ఇదే సమయంలో హరిణి (ఇవానా) అనే అమ్మాయి విజయ్‌ను ప్రేమిస్తుంది. ఇలా కథ ముక్కోణపు ప్రేమకథగా మారుతుంది. చివరికి విజయ్ ఎవరిని ఎంచుకున్నాడు? రాజేంద్రప్రసాద్ పాత్రతో ఉన్న అనుబంధం ఏమిటి? అనేదే మిగతా కథ.

విశ్లేషణ:
దర్శకుడు ఒక సింపుల్ లైన్ చుట్టూ కథను నిర్మించారు. వన్‌లైనర్ కామెడీ, సోషల్ మీడియా మీమ్స్ తరహా సంభాషణలతో సినిమా నడిపారు. మొదటి భాగం స్లోగా సాగినా కొంత వినోదాన్ని అందిస్తుంది. కానీ సెకండ్ హాఫ్‌లో కంటెంట్ బలహీనంగా మారడంతో కామెడీపైే ఆధారపడిన దర్శకుడు, సరైన ఎమోషన్లు లేకుండా కథను కొనసాగించారు.

ఫ్రెష్‌గా అనిపించే డైలాగ్స్ లేకపోవడం, ఓటీటీ హంగులతో పోలిస్తే సినిమా ఫీలింగ్ మందగించడం ఈ చిత్రానికి మైనస్. రాజేంద్ర ప్రసాద్ పాత్రతో సంబంధాన్ని బలంగా చూపించకపోవడం, హీరో పాత్ర డెవలప్‌మెంట్ లో లోపాలు స్పష్టంగా కనిపించాయి.

నటీనటుల ప్రదర్శన:
శ్రీ విష్ణు తనదైన శైలిలో కామెడీ పండించేందుకు ప్రయత్నించాడు. వెన్నెల కిషోర్ తన డైలాగ్ డెలివరీతో ఆకట్టుకున్నాడు. ఇవానా, కేతికా శర్మ స్క్రీన్‌పై ఆకర్షణీయంగా కనిపించారు. మిగిలిన పాత్రలు సరిగ్గా నిలవలేకపోయాయి.

సాంకేతిక విభాగం:
విషాల్ చంద్ర శేఖర్ సంగీతం ఓ మోస్తరుగా ఉంది. సినిమాటోగ్రఫీ, ఎడిటింగ్ కూడా తక్కువ స్థాయిలోనే ఉన్నాయి. దర్శకుడు కార్తిక్ రాజు కథనానికి మెరుగైన బలం కల్పించగలిగినట్లయితే సినిమా ఇంకా మెరుగ్గా ఉండేదని చెప్పవచ్చు.

మొత్తానికి:
‘సింగిల్’ అనే చిత్రం యువతను ఆకట్టుకోవాలనే మంచి ఆలోచనతో రూపొందినప్పటికీ, బలమైన కథా పరిణామాలు, ఫ్రెష్‌ ఎంటర్‌టైన్‌మెంట్ లోపించడంతో పూర్తిగా ఆకట్టుకోలేకపోయింది. కామెడీ అభిమానులు ఓసారి ప్రయత్నించవచ్చు కానీ మిగతావారికి ఇది ఓ మినిమం వాచ్ అనిపించే అవకాశం ఉంది.

రేటింగ్: 3/5

Read More : పద్మభూషణ్‌కు హిందూపురం ప్రజలకు బాలయ్య కృతజ్ఞతలు