కన్నడ స్టార్ హీరో ఉపేంద్ర స్వీయ దర్శకత్వంలో తెరకెక్కిన “యూఐ” సినిమా 2024 డిసెంబర్లో థియేటర్లలో విడుదలై నాటకీయంగా వార్తల్లో నిలిచింది. చాలా కాలం తర్వాత దర్శకత్వ బాధ్యతలు చేపట్టిన ఉపేంద్రకి ఇది ఎంతో ప్రెస్టీజియస్ ప్రాజెక్ట్గా మారింది. ఫస్ట్ లుక్ నుంచే భారీ అంచనాలు నెలకొన్నాయి. కన్నడ ప్రేక్షకుల్లో సినిమాకు మంచి రెస్పాన్స్ వచ్చినా, ఇతర భాషల ప్రేక్షకుల్లో మిశ్రమ స్పందనతో సరైన వసూళ్లు రాలేదు. ముఖ్యంగా తెలుగులో సినిమా పెద్దగా ఆడలేదు. థియేటర్కు వెళ్లని ప్రేక్షకులు మాత్రం ఓటీటీ విడుదల కోసం ఆతురతగా ఎదురు చూస్తున్నారు.
అయితే నాలుగు నెలలు గడిచినా “యూఐ” సినిమా ఇప్పటికీ ఓటీటీలో విడుదల కాలేదు. సాధారణంగా థియేటర్లలో విడుదలైన సినిమాలు నెలరోజుల్లో ఓటీటీలో స్ట్రీమ్ అవుతుండగా, ఈ సినిమా మాత్రం ఇంకా స్ట్రీమింగ్ కాకపోవడం ఆశ్చర్యం కలిగిస్తోంది. జీ 5 ఈ సినిమా హక్కులు భారీ మొత్తానికి తీసుకున్నట్టు గతంలో వార్తలు వచ్చినా, ఇప్పటి వరకు ఎటువంటి అప్డేట్ ఇవ్వకపోవడం గమనార్హం.
దీనిపై నిర్మాణ సంస్థ అయినా, ఉపేంద్ర అయినా ఇప్పటి వరకు ఎటువంటి అధికారిక క్లారిఫికేషన్ ఇవ్వకపోవడం వల్ల అసలు ఓటీటీ బిజినెస్ జరిగిందా? లేదా? అన్న అనుమానాలు ప్రేక్షకుల్లో వ్యక్తమవుతున్నాయి.
ఇక మరోవైపు, శాటిలైట్ హక్కులు ప్రముఖ నేషనల్ ఛానల్ కొనుగోలు చేసిందనే సమాచారం వెలుగులోకి వచ్చింది. సినిమా మొదట టెలివిజన్లో ప్రసారం చేసి, తర్వాతే ఓటీటీలో స్ట్రీమ్ చేయాలన్న వ్యూహం ఉన్నట్టు భావిస్తున్నారు. ఇటీవలి కాలంలో ‘వస్తున్నాం’ వంటి సినిమాలు కూడా అదే విధంగా వచ్చిన సంగతి తెలిసిందే. ‘యూఐ’ కూడా అదే ఫార్మాట్ను ఫాలో అవుతుందా? లేదా? అన్నది వేచి చూడాల్సిందే.
One thought on “ఉపేంద్ర ‘యూఐ’.. 4 నెలలు అయినా ఓటీటీలోకి ఎందుకు రాలేదు?”
Comments are closed.