సీఎం చంద్రబాబు : కాలంతో పరుగు!
పోలవరం ప్రాజెక్టును 2026 అక్టోబర్లో పూర్తి చేస్తామన్న సీఎం
ప్రాజెక్టుకు సంబంధించి ప్రతి పనికి కాల వ్యవధి నిర్ణయిస్తూ, పక్కా ప్రణాళికతో ముందుకు సాగాలని ముఖ్యమంత్రి చంద్రబాబు స్పష్టం చేశారు. అనుమతులు, ఇతరత్రా అంశాలపై దృష్టి సారిస్తూ ఇంజనీరింగ్ విభాగానికి పెద్ద బాధ్యత అప్పగించారు.
- డయాఫ్రం వాల్ పనులకు జనవరి 2న శ్రీకారం
- ఈసీఆర్ఎఫ్ డ్యాం పనులు సమాంతరంగా నిర్వహణ
- గత ప్రభుత్వ కాలంలో ప్రాజెక్టుకు జరిగిన అనేక నష్టాలు
- జగన్ పాలనలో ప్రాజెక్టు సర్వనాశనం
- మా ప్రభుత్వం మళ్లీ గెలిచిన 2021 నాటికే పూర్తి చేసేవాళ్లం
ప్రాజెక్టు పూర్తి చేయడమే ప్రధాన లక్ష్యం
ఏలూరు, డిసెంబర్ 16 (ఆంధ్రజ్యోతి): పోలవరం ప్రాజెక్టును రాష్ట్ర జీవనాడిగా అభివర్ణిస్తూ, దాన్ని ఎట్టి పరిస్థితుల్లోనూ 2026 అక్టోబర్ నాటికి పూర్తి చేస్తామని సీఎం చంద్రబాబు తెలిపారు. సోమవారం పోలవరం ప్రాజెక్టు స్థలాన్ని సందర్శించిన ఆయన, ప్రాజెక్టు పనుల పురోగతిని పరిశీలించి అధికారులతో సమీక్ష నిర్వహించారు. నిర్మాణానికి దిశానిర్దేశం చేసి మీడియాతో మాట్లాడారు.
“ప్రాజెక్టు నిర్మాణానికి 2014-19 మధ్య 72% పనులు పూర్తయ్యాయి. కానీ గత ప్రభుత్వం కేవలం 3.84% పనులు మాత్రమే చేసింది. ఐదేళ్లలో ప్రాజెక్టు పనులు నిలిపివేయడంతో రూ.15,000 కోట్ల నష్టం జరిగింది. ఈ నష్టాన్ని పూడ్చడం అసాధ్యం. అయినప్పటికీ, ఈ ప్రాజెక్టు పూర్తవ్వడం ద్వారా ఆంధ్రప్రదేశ్కి లైఫ్లైన్ అవుతుంది” అని చంద్రబాబు వ్యాఖ్యానించారు.
డయాఫ్రం వాల్ పునర్నిర్మాణం
డయాఫ్రం వాల్ పనులు 2026 మార్చి నాటికి పూర్తవుతాయని సీఎం తెలిపారు. 2019లో మళ్లీ గెలిచిన 2021లోనే పోలవరం ప్రాజెక్టు పూర్తవుతుందని చెప్పారు. రివర్స్ టెండరింగ్ పేరుతో ప్రాజెక్టు పనులు పూర్తిగా నిలిపివేయడమే నష్టానికి కారణమన్నారు.
గత ప్రభుత్వ వైఫల్యాలు
“గత ప్రభుత్వం ఎత్తు తగ్గించడంపై కేంద్రానికి లేఖ రాసింది. నష్టానికి కారణమైన వారిపై చర్యలు తీసుకోవాలంటూ డిమాండ్ చేస్తున్నాం. ప్రస్తుతం 76.79% పనులు పూర్తయ్యాయి. మిగిలిన పనులను నిర్దిష్ట గడువులోగా పూర్తి చేయడం మా బాధ్యత” అని సీఎం చెప్పారు.
“పోలవరం ప్రాజెక్టు ఐకాన్గా నిలవాలి. ఇది పూర్తవ్వడం ద్వారా నదుల అనుసంధానం జరిగి రాష్ట్రానికి నీటి సమస్యలన్నీ ముగుస్తాయి” అంటూ చంద్రబాబు ప్రాజెక్టు ప్రాముఖ్యాన్ని వివరించారు.
దిశానిర్దేశం చేస్తూ…
సీఎం చంద్రబాబు తమ పాలనలో ప్రాజెక్టు పనులు వేగవంతం చేశామన్నారు. “ప్రాజెక్టు వద్ద యంత్ర సామగ్రి సిద్ధంగా ఉంది. అన్ని అనుమతులు త్వరగా పూర్తవ్వడం కోసం కేంద్రంతో చర్చలు జరుపుతున్నాం. రాష్ట్రానికి ప్రాజెక్టు లైఫ్లైన్ అవుతుందని నమ్మకంగా ఉన్నాం” అని ఆయన ధీమా వ్యక్తం చేశారు.
