హైదరాబాద్: తెలంగాణ అసెంబ్లీ సమావేశాలు వేడిగా కొనసాగుతున్నాయి. సభ కార్యకలాపాలపై సభ్యులకు సరైన సమాచారం అందించకపోవడంపై విపక్షాలు అసహనం వ్యక్తం చేశాయి. శాసనసభ నడిపే తీరును తప్పుబడుతూ, ఆర్థిక పరిస్థితులపై చర్చను సమాచారం లేకుండా పెట్టారని విపక్షాలు విమర్శించాయి. శాసనసభ నిబంధనల ప్రకారం సభ నిర్వహణ జరగాలని ఎంఐఎం పక్షనేత అక్బరుద్దీన్ స్పీకర్ దృష్టికి తీసుకెళ్లారు.
భారాస ఎమ్మెల్యే హరీశ్ రావు మాట్లాడుతూ, “సభ నడిపే విధానం ఇది కాదు,” అని వ్యాఖ్యానించారు. అలాగే భాజపా పక్షనేత మహేశ్వర రెడ్డి, సభ్యులకు పూర్తి సమాచారం లేకుండా మాట్లాడమంటారా? అంటూ స్పీకర్ను ప్రశ్నించారు. ఈ నేపథ్యంలో విపక్ష మరియు అధికార సభ్యుల మధ్య తీవ్రమైన వాగ్వాదం చోటు చేసుకుంది, సభలో గందరగోళం ఏర్పడింది.
విపక్ష సభ్యుల విమర్శలకు మంత్రి శ్రీధర బాబు స్పందించారు. “సభ నిర్వహణలో కొంత సమాచార లోపం జరిగింది. దీని కోసం స్పీకర్ క్షమాపణ చెప్పాలంటారా?” అని ఆయన మండిపడ్డారు. స్పీకర్ కార్యాలయం తీసుకునే నిర్ణయాలకు అన్ని పార్టీలు కట్టుబడి ఉండాలని స్పష్టం చేశారు.
“హరీశ్రావు, అక్బరుద్దీన్ ఇద్దరూ సీనియర్ సభ్యులు. సమాచార లోపం జరిగిందని మేమే చెబుతున్నాం. అయినా, క్షమాపణ చెప్పాలంటున్నారు. వారు ఏదైనా చెప్పాలనుకుంటే రిక్వెస్ట్ చేయాలి, కానీ హుకుం జారీ చేయొద్దు. అవసరమైతే తప్పకుండా క్షమాపణ చెబుతాం. కానీ చర్చను పక్కదారి పట్టించడానికే విపక్షాలు ఇలా చేస్తున్నాయి. ప్రభుత్వంగా ఏదైనా పొరపాటు జరిగితే శాసనసభ వ్యవహారాల మంత్రిగా బాధ్యత నాదే. అయితే, స్పీకర్ క్షమాపణ చెప్పాలంటే ఎలా సాధ్యం అవుతుంది?” అంటూ శ్రీధర బాబు వ్యాఖ్యానించారు.
