టాలీవుడ్ సినీ పరిశ్రమలో కార్మికుల సమస్యలు ముదురుతున్న వేళ, ఫిలిం ఎంప్లాయిస్ ఫెడరేషన్ అధ్యక్షుడు అనిల్ వల్లభనేని ఈ వివాదంపై స్పందించారు. ఏబీఎన్ ఆంధ్రజ్యోతితో మాట్లాడుతూ, “ఫెడరేషన్తో సంప్రదింపులు చేస్తామని చెప్పిన ఫిలిం ఛాంబర్, ఒక్కసారిగా ఫెడరేషన్ వద్దు అనే ప్రకటన చేయడం బాధాకరం” అని వ్యాఖ్యానించారు.
అనిల్ వల్లభనేని మాట్లాడుతూ, “తెలుగు సినిమాలు అంతర్జాతీయ స్థాయిలో గుర్తింపు పొందడానికి మన కార్మికుల నైపుణ్యమే కారణం. స్కిల్ లేదని అంటున్నవారు, కొత్త కెమెరాలు, టెక్నాలజీ కోసం శిక్షణా శిబిరాలు నిర్వహించాలి కానీ, కార్మికులను పక్కన పెట్టి కొత్తవారితో పని చేస్తామని చెప్పడం సరైన నిర్ణయం కాదు” అన్నారు.
“కార్మికులు రోజుకు 15 గంటలు శ్రమిస్తున్నారు. వేతనాల పెంపు కోసం మేము ఎప్పటి నుంచో అడుగుతున్నాం. వేతనాలు అడిగితే కొత్తవారిని తీసుకుంటామని నిర్మాతలు చెబుతున్నారు. ఇది స్పష్టమైన శ్రమ దోపిడి. అయితే, కొంతమంది నిర్మాతలు మా అభ్యర్థనను అంగీకరించి అడిగిన వేతనాలను ఇస్తున్నారు. బయట ప్రచారం జరిగేంతగా మా వేతనాలు ఎక్కువ కావు” అని వివరించారు.
వివాద పరిష్కారానికి చర్చే మార్గమని సూచించిన ఆయన, “ఫిలిం ఛాంబర్, నిర్మాతలకు అభ్యంతరాలు ఉంటే కూర్చుని చర్చించాలి. లేదంటే మా యాక్షన్ ప్లాన్ ప్రకటిస్తాం” అని హెచ్చరించారు.
ప్రస్తుతం టాలీవుడ్లో కార్మికుల వేతనాల అంశం చర్చనీయాంశమైంది. నైపుణ్యం ఉన్న కార్మికులను పక్కన పెట్టడం సరికాదని ఫెడరేషన్ వాదిస్తోంది. చర్చల ద్వారానే పరిష్కారం సాధ్యమని భావిస్తున్నప్పటికీ, అవసరమైతే ఉద్యమ మార్గాన్ని ఎంచుకుంటామని స్పష్టం చేసింది.
Read More : Hansika : విడాకుల పుకార్లకు మరింత బలం
One thought on “టాలీవుడ్లో కార్మిక సమస్యలు ముదురుతున్నాయి”
Comments are closed.