భారత క్రికెట్ అభిమానులకు గర్వకారణంగా నిలిచే ఘట్టం ఇది. భారత మాజీ కెప్టెన్, వికెట్ కీపర్-బ్యాటర్ మహేంద్ర సింగ్ ధోనీ తన క్రికెట్ ప్రయాణంలో మరో గొప్ప గౌరవాన్ని అందుకున్నారు. అంతర్జాతీయ క్రికెట్ మండలి (ICC) ప్రకటించిన ప్రతిష్టాత్మక ‘హాల్ ఆఫ్ ఫేమ్’లో ధోనీకి స్థానం లభించడం క్రికెట్ ప్రపంచంలో సర్వత్రా ప్రశంసలు కురిపిస్తోంది. ఈ ఏడాది ఈ గౌరవాన్ని పొందిన ఏడుగురు క్రికెటర్లలో ధోనీ ఒకరిగా ఎంపికయ్యారు. ఆయనతో పాటు ఆస్ట్రేలియాకు చెందిన మాథ్యూ హెడెన్, దక్షిణాఫ్రికా బ్యాటింగ్ దిగ్గజం హషీమ్ ఆమ్లా ఈ జాబితాలో చోటు దక్కించుకున్నారు.
ఐసీసీ ఒక ప్రకటనలో పేర్కొంటూ, “ఎంఎస్ ధోనీ శాంత స్వభావం, అద్భుతమైన వ్యూహాత్మక నైపుణ్యం ఆయనను ఇతరులకంటే భిన్నంగా నిలిపాయి. పరిమిత ఓవర్ల క్రికెట్లో ఆటను ముగించడంలో ఆయన చూపిన నైపుణ్యం, నాయకత్వం, వికెట్ కీపింగ్లో అతని సత్తా అంతులేని సంపదగా భారత క్రికెట్కు నిలిచాయి” అని తెలిపింది.
ధోనీ భారత్ తరఫున అన్ని ఫార్మాట్లలో కలిపి 538 మ్యాచ్లు ఆడి 17,266 పరుగులు సాధించారు. వికెట్ల వెనుక 829 మంది ఆటగాళ్లను అవుట్ చేసి రికార్డుల పుటల్లో తన పేరు ఖచ్చితంగా లిఖించారు.
నాయకుడిగా ధోనీ మూడుసార్లు భారత్ను ప్రపంచ స్థాయి ట్రోఫీలను గెలిపించడంతో ప్రత్యేక గుర్తింపు పొందారు. 2007లో టీ20 వరల్డ్కప్, 2011లో వన్డే వరల్డ్కప్, 2013లో చాంపియన్స్ ట్రోఫీ భారత్ ఖాతాలో చేరాయి. వన్డేల్లో అత్యధిక స్టంపింగ్లు (123), వికెట్ కీపర్గా అత్యధిక వ్యక్తిగత స్కోరు (183 నాటౌట్) వంటి పలు రికార్డులు కూడా ఆయన ఖాతాలో ఉన్నాయి.
ఈ గౌరవంపై స్పందించిన ధోనీ… “ఐసీసీ హాల్ ఆఫ్ ఫేమ్లో నా పేరు ఉండటం నాకు గర్వకారణం. క్రికెట్ చరిత్రలో ఎంతో మంది లెజెండ్లతో పాటు నన్ను గుర్తించినందుకు ధన్యవాదాలు. ఇది నేను ఎప్పటికీ మరిచిపోలేను” అంటూ హర్షం వ్యక్తం చేశారు.
2020లో అంతర్జాతీయ క్రికెట్కు వీడ్కోలు పలికినప్పటికీ, ధోనీ ఇంకా ఐపీఎల్లో చెన్నై సూపర్ కింగ్స్ తరఫున ప్రాతినిధ్యం వహిస్తున్నారు. తాజాగా హాల్ ఆఫ్ ఫేమ్ గౌరవంతో ధోనీ పేరు క్రికెట్ చరిత్రలో మరింత వెలుగొందనుంది.
Read More : వెస్టిండీస్ స్టార్ క్రికెటర్ రిటైర్మెంట్ ప్రకటన
One thought on “ICC Hall of Fameలో మహేంద్ర సింగ్ ధోనీకి స్థానం”
Comments are closed.