తెలంగాణ సర్కార్ కీలక నిర్ణయం
ఎన్నికల కోడ్ అమలులోకి రావడంతో నిలిచిపోయిన ఇందిరమ్మ ఆత్మీయ భరోసా నిధుల విషయమై తెలంగాణ ప్రభుత్వం మరోసారి చొరవ చూపింది. మహాశివరాత్రి పర్వదినాన్ని పురస్కరించుకొని, ఉపాధి కూలీలకు సంతోషకరమైన వార్త అందించింది.
తెలంగాణ ప్రభుత్వం ఇందిరమ్మ ఆత్మీయ భరోసా కింద నిధుల విడుదలకు అనుమతి ఇచ్చింది. ఎన్నికల నియమావళి అమల్లో లేని ఉమ్మడి రంగారెడ్డి, మహబూబ్నగర్ జిల్లాల్లో ఈ నిధులను అందజేశారు. ప్రభుత్వం ఈ పథకాన్ని ఈ ఏడాది జనవరి 26న ప్రతిష్టాత్మకంగా ప్రారంభించిన విషయం తెలిసిందే. దాని తరువాత గ్రామ సభలు నిర్వహించి, పైలెట్ గ్రామాల్లోని ఉపాధి కూలీల ఖాతాల్లో నిధులను జమ చేశారు.
మొత్తం 18,180 మంది లబ్ధిదారులకు ఒక్కొక్కరికి రూ.6 వేల చొప్పున నిధులు అందించారు. అయితే, మండలి ఎన్నికల నేపథ్యంలో ఎన్నికల కోడ్ అమలులోకి రావడంతో ఈ పథకం తాత్కాలికంగా నిలిచిపోయింది.
మంత్రి సీతక్క విజ్ఞప్తి – సానుకూల స్పందన
ఎన్నికల నియమావళి ప్రభావితం కాని జిల్లాల్లో ఈ పథకం కొనసాగించాలని మంత్రి సీతక్క ప్రభుత్వం వద్ద విజ్ఞప్తి చేశారు. దీనిపై సానుకూలంగా స్పందించిన ప్రభుత్వం, ఉమ్మడి మహబూబ్నగర్ మరియు రంగారెడ్డి జిల్లాల్లో నిధుల విడుదలకు ఆదేశాలు జారీ చేసింది.
ఈ రెండు జిల్లాల్లో మొత్తం 66,240 మంది ఉపాధి కూలీలకు ఇందిరమ్మ ఆత్మీయ భరోసా కింద రూ.39.74 కోట్లు వారి ఖాతాల్లో జమ చేయాలని ప్రభుత్వం నిర్ణయించింది. ఈ నిర్ణయంతో ఉపాధి కూలీలకు ఉత్సవ వాతావరణం నెలకొంది.
One thought on “మహాశివరాత్రి సందర్భంగా ఉపాధి కూలీలకు శుభవార్త: ఇందిరమ్మ ఆత్మీయ భరోసా నిధుల విడుదల”
Comments are closed.