కాంతలో భాగ్యశ్రీ పాత్ర… కీర్తిని గుర్తు చేస్తుందా?

సినిమా కథలు వేర్వేరు అయినప్పటికీ, కొన్నిసార్లు అందులోని పాత్రలు ఒకేలా అనిపిస్తాయి. అలాంటి పోలికే ప్రస్తుతం చర్చనీయాంశమైంది. దుల్కర్ సల్మాన్ చేసిన సూపర్‌హిట్‌ సినిమా ‘మహానటి’లోని పాత్రకు, ఆయన రాబోతున్న కొత్త చిత్రం ‘కాంత’లోని పాత్రకు కాస్త దగ్గర పోలికలున్నట్టు సినీ వర్గాలు చెబుతున్నాయి.

తెలుగులో దుల్కర్ సల్మాన్ ఎంట్రీ ఇచ్చిన చిత్రం ‘మహానటి’. ఇందులో జెమిని గణేశన్ పాత్రలో నటించి ఆకట్టుకున్నారు. సినిమాలో హీరోయిన్‌గా కీర్తి సురేష్ కనిపించి, ఆమెతో జెమిని గణేశన్ ప్రేమలో పడినట్టు కథ నడిచింది. ఇక రాబోతున్న ‘కాంత’ చిత్రంలోనూ ఇలాంటి కాన్సెప్ట్ కనిపిస్తుందని సమాచారం. ఈ సినిమాలో భాగ్య శ్రీ బోర్స్ హీరోయిన్ పాత్రలో నటిస్తున్నారు. అంటే ఇందులో కూడా “సినిమాలో సినిమా హీరోయిన్” పాత్రకే దుల్కర్ జోడీగా నటించనున్నారని తెలుస్తోంది.

‘కాంత’ చిత్రంలో రానా దగ్గుబాటి కూడా కీలక పాత్రలో నటిస్తున్నారు. అయితే ఆయన పాత్ర ఏమిటో చిత్రబృందం ఇంకా రహస్యంగానే ఉంచింది. ఇటీవల విడుదలైన టీజర్‌తో సినిమాపై ఆసక్తి మరింత పెరిగింది. ఈ సినిమా పీరియాడికల్ డ్రామా కావడంతో, కథలో ఉండే మలుపులు ప్రేక్షకులను ఆశ్చర్యపరుస్తాయని యూనిట్ చెబుతోంది.

ఈ చిత్రాన్ని సెల్వమణి సెల్వరాజ్ దర్శకత్వం వహిస్తున్నారు. మిస్టర్ బచ్చన్‌తో టాలీవుడ్‌లో అడుగుపెట్టిన భాగ్య శ్రీ బోర్స్, విజయ్ దేవరకొండతో ‘కింగ్‌డమ్’, రామ్‌తో ‘ఆంధ్రా కింగ్’ చిత్రాల్లో నటించారు. ఇప్పుడు ‘కాంత’తో మరో విభిన్న ప్రయత్నం చేస్తోందని సినీ వర్గాలు అంటున్నాయి.

సినిమాలోని పాత్రలు, కథలోని మలుపులు ఎలా ఉంటాయనేది చిత్రం విడుదలయ్యాకే స్పష్టమవుతుంది.