అంతరిక్ష చరిత్రలో కొత్త అధ్యాయం..

అంతరిక్ష యాత్రలో మరో అరుదైన ఘట్టం నమోదైంది. ప్రముఖ పాప్ గాయని కేటీ పెర్రీ సహా ఆరుగురు మహిళల బృందం బ్లూ ఆరిజిన్ సంస్థ ఆధ్వర్యంలో అంతరిక్ష ప్రయాణాన్ని విజయవంతంగా పూర్తి చేసింది. సోమవారం పశ్చిమ టెక్సాస్‌లోని లాంచ్ ప్యాడ్ నుంచి ఉదయం 9:31 గంటలకు న్యూషెపర్డ్ రాకెట్‌ ఆకాశాన్ని చీల్చి ముందుకు దూసుకెళ్లింది. కొద్దిసేపటికే బృందం అంతరిక్షపు అంచుకు చేరుకొని, అక్కడ కొంతసేపు భారరహిత స్థితిని అనుభవించింది. మొత్తంగా ఈ యాత్ర 11 నిమిషాల పాటు సాగి, చివరికి భద్రంగా భూమికి తిరిగి చేరింది.

ప్రముఖ బిలియనీర్ జెఫ్ బెజోస్ స్థాపించిన బ్లూ ఆరిజిన్ సంస్థ ఈ అంతరిక్ష యాత్రను ప్రత్యక్షంగా ప్రసారం చేసింది. గత 60 ఏళ్ల అంతరిక్ష చరిత్రలో కేవలం మహిళలతో కూడిన బృందంగా తొలిసారి ఈ రోచకమైన ప్రయాణం సాగడం విశేషంగా నిలిచింది.

ఈ మిషన్‌లో కేటీ పెర్రీతో పాటు బెజోస్ కాబోయే భార్య లారెన్ సాంచెజ్, సీబీఎస్ యాంకర్ గేల్ కింగ్, నాసా మాజీ రాకెట్ శాస్త్రవేత్త అయేషా బోవే, శాస్త్రవేత్త అమందా ఎన్గుయెన్, సినీ నిర్మాత కెరియాన్నె ఫ్లిన్‌లు పాల్గొన్నారు. అంతరిక్ష యాత్రను విజయవంతంగా ముగించిన అనంతరం లాంచ్ సైట్ వద్ద భావోద్వేగాలు ఉప్పొంగాయి.

బయటకు వచ్చిన వెంటనే లారెన్ సాంచెజ్‌ను జెఫ్ బెజోస్ హత్తుకుని సంతోషం వ్యక్తం చేయగా, కేటీ పెర్రీ తన కుమార్తె డైసీ గుర్తుగా అంతరిక్షంలో తీసుకెళ్లిన డైసీ పువ్వును తిరిగి భూమికి తీసుకొచ్చారు. అంతరిక్షపు గగనతలంలో ‘వాట్ ఎ వండర్‌ఫుల్ వరల్డ్’ పాటను ఆలపించిన అనుభవాన్ని గేల్ కింగ్ మీడియాతో పంచుకున్నారు.

ఈ అనుభవాన్ని సాక్షాత్కరించేందుకు లాంచ్ సైట్ వద్ద ఓప్రా విన్‌ఫ్రే సహా ప్రముఖులు క్రిస్ జెన్నర్, ఖ్లో కర్దాషియన్‌ హాజరయ్యారు.

అంతరిక్ష చరిత్రలో 1963లో సోవియట్ వ్యోమగామి వాలెంటినా తెరిష్కోవా మహిళగా ఒంటరిగా భూమి చుట్టూ పరిభ్రమించిన తర్వాత, ఇది మహిళలతో కూడిన తొలి బృందాంతరిక్ష యాత్రగా నిలిచింది.